Халхголын хурдан хээрийн мялаалга уралдаан болно

Ардын хувьсгалын 91 жилийн ой, Үндэсний их баяр наадмын хурдан  азарганы уралдаанд айргийн тавд хурдалсан Сэлэнгэ аймгийн Сүхбаатар сумын уяач Б.Батсүхийн хээр азарганы мялаалга наадам ирэх сарын 15-нд Сэлэнгэ аймгийн төв Сүхбаатар хотноо болно. Эзнийхээ 20  жилийн хүлээлтийг тайлж,  төрийнхөө наадамд  уясан эзнээ цулбуур өргүүлсэн хурдан  хээр нь Дорнод аймгийн Халхгол сумын уугуул, аймгийн Алдарт уяач А.Цогоогийн унаган адуу.  Цогоо Алдартын хурдан хул азарганы төл хээр үрээг дааганаас нь юм дуулгах адуу хэмээн моринд нүдтэй хашир уяачид хэдийнэ таньж амжжээ.  Ийнхүү даагандаа гурав түрүүлчихээд, Алтан-Овооны тахилга наадамд 18-аар  ирэхэд нь одоогийн эзэн Батсүх  уяач авч байжээ. Энд сонирхуулахад Батсүх нь Цогоо Алдартын хүргэн дүү юм.  Зургаадугаар ангиасаа хойш морь малны захад “үнэнчээр”  яваа аймгийн Алдарт уяач Батсүх  ингэж АХ-ын 91 жилийн баяр наадмаар анхны айргаа Хээр азарганыхаа амжилтаар хүртсэн нь энэ байлаа. Хээр азарганы мялаалга наадамд их нас, даага уралдах бөгөөд түрүү морийг мотоциклоор байлахаар болжээ.