Mаргааш онц сонирхолтой уралдаан болно

Цэвэр цусны адууны түүхэн дэх хамгийн шилдэг хүлэг Франкел маргааш буюу 10 дугаар сарын 20-ны өдөр зодог тайлах уралдаанаа хийх гэж байна.

Таймформын чансааг 147 оноогоор тэргүүлж, бүх цаг үеийн шилдэг хүлгээр тодроод буй Франкел нийт 13 уралдахдаа 13 түрүүлээд байгаа босоо хүлэг билээ. Шүдлэн, хязаалан насандаа Дэлхий, Европыг шилдэг хүлэг цолыг 4 төрөлд хүртсэн Франкелыг ялагдашгүй хэвээр зодог тайлж чадах эсэхийг харахыг хурдан морь сонирхогчид бүгдээрээ тэсэн ядан хүлээж байгаа нь лавтай.

Удахгүй зодог тайлж, ирэх хавраас үржүүлгэнд орох болсон Франкелийг Бридерс Кап-д, эсвэл Прикс де л’Арк де Триомп-д сүүлийн уралдаанаа хийж магадгүй гэж байсан ч тэрээр Их Бритнийн I зэрэглэлийн Чемпионс Стейкс-т уралдахаар болсон юм. Энэ уралдаанд түүнтэй уралдахаар дэлхийн чансааны №3 Сирус дэс Аглес (Cirrus des Aigles), №13 Натаниел нарын тэргүүтэй 5 хүлэг уягдаж байна.

Франкелын 13 түрүүний 9 нь дээд буюу I зэрэглэлийн уралдааных бөгөөд дэлхийн чансааг тэргүүлэгчид болох Экселебрейшн, Натаниел, Фар, Кенфорд Клифс, Твайс Ове, Сэнт Николас Аббей зэрэг хүлгүүд түүний тоосонд дарагдаж байв.

Франкелийн уяач Сэр Хенри Сесил өөрийн хүлгээ уралдаанд бэлэн болсныг BBC телевизийн сурвалжлагчид мэдэгджээ. Мөн бороо их орсны улмаас нойтон зам дээр уралдах болсонд санаа зовохгүй байна гэжээ. Эцэст нь Франкелийг түрүүлж, ялагдашгүй хэвээр зодог тайлна гэдэгт итгэж байгаагаа хэлсэн байна.

Франкелийн гол өрсөлдөгчид тооцогдож байгаа Францын унаган хүлэг Сирус дэс Аглес нь 10 дугаар сарын 6-нд болсон Катар Прикс Доллар уралдаанд 7 бүтэн биений зайтай түрүүлж, хурдан байгаагаа харуулсан юм. Мөн тэрээр 2012 гарснаас хойш Франц болон АНЭУ-д болсон I зэрэглэлийн уралдаануудад тасархай түрүүлээд байгаа.Энэ жил 6 настай хээр морь нь нийт 46 уралдахдаа 16 түрүүлж, 3,7 сая еврогийн бай хүртээд байгаа юм. Тэрээр 2011 оны Европын Шилдэг морь цолны эзэн билээ.

Сирус дэс Аглес-н уяач Коррайн Баранде-Барбе “Миний морь Франкелийг дийлбэл би л лав гайхахгүй. Франкел өмнө нь Сирус дэс Аглес шиг өрсөлдөгчтэй уралдаж байгаагүй. Тэгээд ч Сирус дэс Аглес энэ жил гойд хурдан байгаа” гэж мэдэгдсэн байна.
Эх сурвалж: www.mongoljockeyclub.com