Унаач Э.Эрдэнэтөгс: Наадам нэгээр дуусахгүй

-Манай уншигчдад өөрийгөө танилцуулаач. Хэд дэх жилдээ хурдан морь унаж байгаа вэ?
-Би Өмнөговь аймгийн Булган сумын унаач байгаа юм. Анх таван настайдаа хурдан морь унаж байснаас хойш найман жил өнгөрсөн байна. Одоо би чинь наймдугаар анги. Тийм болохоор удахгүй мориноос хасагдах байхаа. Анх намайг морь унаж сурахад Манлай сумын харьяат, аймгийн Алдарт уяач Мөнх-Эрдэнэ ах маань их тусалсан.. Анхны А үсгийг заасан хүн байгаа юм. Энэ хугацаанд олон наадамд оролцож байснаас Булган суманд их насны морь, даага унаж, түрүүлгэж байсан маань их сайхан санагддаг.
-Энэ жил яаж наадав?
-Луу жил гарсаар зургаадугаар сарын 1-нд Хүрмэн суманд болсон уралдаанд оролцсон. Ноён сумын уяач Бадрах гэж хүний морийг унаж, наймаар давхиулсан. Бас Мандал-Овоод уралдаж, айрагт давхиж байгаад харамсалтай нь суугаад хойгуур орчихсон.
-Аймгийн наадамд уралдаж байв уу? Ямар ямар амжилт гаргасан бэ?
-Уралдалгүй яахав. Тэр дундаас анх удаа өөрийнхөө дэлтэй хонгор морийг унаж 11-ээр орж байлаа. Ер нь аймагт уралдсан нийт уралдаанаас хоёр түрүү, нэг айраг авч байсан. Мөн Булган сумын Нүцгэнд болсон зүүн бүсийн уралдаанд нэг түрүү, нэг айраг авч “Шилдэг унаач” болж байсан. Бас “Шилдэг сурагч”-аар шалгарч байлаа.
-Хэний ямар морийг унах дуртай вэ?
-Өөрийнхөө морийг л унах дуртай. Өөр хүний морийг унах амаргүй л дээ. Адаглаад л занг нь сайн мэдэхгүй болохоор хэцүү байдаг юм.
-Унаачид уралдааны замд өрсөлдөгчид байх, тийм үү?
-Мэдээж шүү дээ. Жирийн үед бүгд найзууд. Харин уралдааны замд гараанаас эхлээд л барианд орох хүртлээ д өрсөлдөгчид болчихдог юм. Гэхдээ өрсөлдөж байгаа ч буруу зүйл хийж болохгүй. Наадам нэгээр дуусахгүй шүү дээ. Би чинь морь унаад багагүй хугацаа өнгөрчихлөө.  Шинээр морь унаж байгаа хүүхдүүдийн хувьд ах гэсэн үг. Тийм болохоор өөрийн чаддаг мэддэгээ дүү нартаа зааж өгдөг юм. 
-Том болоод ямар мэргэжилтэй болох вэ?
-Цаашдаа сургуульд суралцаж мэргэжил эзэмшинэ гэж боддог. Сургууль соёлоо төгсөөд, мэргэжилтэй болсон хойноо аавынхаа уяаны эрдмийг өвлөж морио уяна даа.
-Ярилцсанд баярлалаа. Хүссэн мэргэжлээ эзэмшиж, сайн уяач болоорой.