Амьд домог Франкел түрүүлж босоо хэвээр зодог тайллаа

Жадмонт зүчээний унаган хүлэг Франкел өнөө цагийн төдийгүй, бүх цаг үеийн шилдэг хүлэг гэдгээ харуулж, зодог тайлах уралдаандаа дэлхийн чансааны №3 Сирус дэс Аглес (Cirrus des Aigles), №13 Натаниел нарыг дийлэн түрүүллээ.

Тэрээр 14 дэх буюу сүүлийн уралдаанаа уржигдар болсон Их Британийн I зэрэглэлийн Чемпионс Стейкс-т хийж энэ цагийн шилдэг хүлгүүдийг дийлэн түрүүлж босоо хүлэг гэдгээ харуулсан юм. Энэ уралдаанд Сирус дэс Аглес аман хүзүүдэж, Натаниел 3-т хурдалжээ.

Таймформын чансааг 147 оноогоор тэргүүлж буй Франкел-н чансаа энэ уралдааны түрүүгээр дахин нэмэгдэж шинэ дээд амжилт тогтоох нь тодорхой болоод байна.

Уралдаан эхлэхэд Франкел гараа алдаж хамгийн араас нэхсэн боловч аргагүй л аварга хүлэг гэдгээ харуулан хүчтэй өрсөлдөгчдөө дийлэн түрүүлсэн юм. Уралдааны өмнө Коррайн Баранде-Барбе-н мэдэгдэж байсанчлан Сирус дэс Аглес үнэхээр хурдан байж Франкелтэй маш ширүүн уралдсан боловч босоо аваргыг үнэхээр дийлсэнгүй.

Уралдаан эхлэхээс 1 хоногийн өмнө буюу 19-ний өдөр Франкелийн эзэн Халид Абдулагийн бие төлөөлөгч уралдаан болох зам хэт нойтон байгаа тул яг уралдахын өмнө Франкелд аюулгүй эсэхийг шалгаж байж уралдуулна гэж байв. Гэвч бүх зүйл ном ёсоороо болж, сая сая морины хорхойтнуудад Франкелийн гайхамшигт түрүүг дахин харах хувь тохиолоо. Өнгөрсөн хавар Франкелийн хөл бага зэрэг доголж, нарийн шинжилгээ хийлгэсний үндсэн дээр уяандаа үргэлжлүүлж орсон билээ.

Франкел 14 уралдахдаа 14 түрүүлж, үүний 10-т нь I зэрэглэлийн уралдаанд түрүүллээ. Тэрээр сүүлийн 2 жил дандаа I зэрэглэлийн уралдаанд чансаа өндөр шилдэг хүлгүүдийг дийлэн түрүүлж, хурдан морины түүхэн дэх амьд домог болсон гэхэд маргах хүн гарахгүй биз ээ.

Хурдан морины мэргэжилтнүүдийн үнэлснээр 100 сая фунт буюу 222 тэрбум төгрөгийн үнэтэй Франкелийн үржүүлгийн хураамж 100,000 фунт буюу 222 сая төгрөгөөс эхэлнэ гэж үзэж байна.

Сүүлийн 2 жил хурдан морины ертөнцийг байлдан дагуулж буй хүлгийн уяач Сэр Хенри Сесил, унаач Том Куэли нар домогт хүлгээрээ бахархаж байгаагаа мэдэгджээ.

Эх сурвалж: www.mongoljockeyclub.com