Шилдэг унаач Б.Батхишиг: Өвлийн өвгөнд олон айраг, түрүүтэй болмоор байгаагаа хэлсэн

Бяцхан шилдэг унаачдын яриа энэ удаад “Ажнай шарга” галын Батцоожийн Батхишигийнхээр үргэлжилж байна. Тэрээр 2012 онд улс бүсийн наадмаас нэг түрүү, дөрвөн айраг хүртсэн амжилтаараа шилдэг унаачдын дөрөвдүгээрт эрэмбэлэгдсэн юм. Галынхаа унаачдаас хамгийн отгон нь болох Батхишиг энэ үдэш нагац эгчийнхээ урласан үндэснийхээ хувцсаар гоёсон нь  хурсан олныг эгдүүг өөрийн эрхгүй хүргэж байсан гээч. “Шадар сайд Энхболд ахын халзан бид хоёр олон удаа амжилт гаргаж байгаа” хэмээн бахдан ярих шилдэг унаачтай цөөн хором хөөрөлдсөнөө хүргэж байна.
-Оны шилдэг унаач болсон дүүдээ баяр хүргэе?
-Баярлалаа. “Тод магнай” сайтаар дамжуулан энд цугласан “морины” хамт олондоо шинэ жилийн баярын мэндийг хүргэе. Ирж байгаа 2013 онд одтой байгаарай гэж хүсэх байна.
-Өөрийгөө манай уншигчдад дэлгэрэнгүй танилцуулаач?
-Би одоо 9 настай. Эрдэнэтийн Улаантолгой сумын нэгдүгээр сургуулийн Оюун багштай гуравдугаар ангид сурдаг. Миний аав Батцоож, ээж Дэлгэртуяа нар малчин хүмүүс. Бид ам бүл дөрвүүлээ. Миний ах Батбилэг 12 настай. Бас хурдан морь унадаг. Гэхдээ би ахынхаа амжилтыг нэг бүрчлэн мэддэггүй юмаа. /инээв/
-2012 онд ямар ямар амжилт гаргасан бэ?
-Энэ жил  Энхболд ахын халзан бид хоёр олон сайхан амжилт гаргаж, уяач нараа баярлуулсан шүү. Ардын хувьсгалын 91 жилийн ойн баяр наадмын их насанд халзантайгаа дөрөвлөсөн. Манай Дашчийрэв агаа бие дааж морь уяад анх удаа төрийнхөө наадмаас хишиг хүртсэн гээд үнэхээр их баярласан. Сая бас шилдэг уяач болсон, та харсан биз дээ. 
-Өөр ямар ямар амжилт гаргасан билээ?
-Халзантай Хэнтий аймгийн Баянхутаг, Сүхбаатар аймгийн Түмэнцогт суманд болсон уралдаануудад түрүүлсэн. Бас Сүхбаатарт аймгийн Алдарт уяач Жаргалсайхан ахынхаа даагыг унаж  дөрөвлөсөн. Түмэнцогтод Дашчийрэв ахын уясан азаргатай барианаас гарахдаа халтирч унаад 15-аар орчихсон. Энэ тухай дурсахаар одоо ч таагүй санагдаад байдаг юм. Гэхдээ сургамж болсон гэж хэлж болох юм байна.
-“Ажнай шарга” гал олон унаач хүүхэдтэй юу?
-Бид дөрөв, тавуулаа. Манай галын хамгийн том нь 13-тай. Харин би хамгийн бага нь.
-Анх  аль наадамд, ямар насны морь унаж байсан бэ?
-Би зургаан настайдаа морь унаж сурсан гэж дээр хэлсэн дээ. Гэхдээ найман настайгаа уралдаж байгаа. Тэгэхээр би унаач хүүхдүүдийн хувьд шинэ хүүхэд байгаа биз. /инээв/  Анх Архангайн наадамд тус аймгийн Пүүжээ гэж ахын морийг унаж 9-д орж байсан. Харин улс бүсийн чанартай наадмуудад 2012 оны хавраас л эхэлж уралдаж байгаа юм. Баянхутагт болсон уралдаанд Энхболдын морийг унаж нэгд орсон. Харин Цэрэнбалтав ахын соёолонтой  түрүүлсэн. Энхболд ахын халзан бид хоёр олон уралдаанд оролцож, айраг түрүү хүртэж байгаа болохоор би их хайртай. Ер нь Мөлүү хээрийг бас халзан морио унах дуртай.
-Хурдан морь унахад хамгийн гоё нь юу байдаг юм бэ?
-Мэдээж  түрүүлэх шүү дээ. Салхи сөрөн давхиж байх их гоё санагддаг юм. За тэгээд мэдээж цоллуулах  бас их гоё мэдрэмж төрүүлдэг.
-Танай ангид унаач хүүхдүүд байдаг уу?
-Бий. Надтай нийлээд тав байна. Бид хэд чинь хааяа мориныхоо тухай ярина. Хүүхдүүд надаас “ямар морь хурдан бэ? гэж асуухаар би халзан л хамгийн хурдан” гэж хэлдэг юм.
-Сая унаач хүүхдүүдтэй уулзаж байхад түрүүлэх морь андашгүй гэж ярьж байна. Чи үүнийг мэдэх үү?
-Би мэднэ шүү дээ. Наадмын өглөө уяан дээрээ сортолзоод л, сэргэлэн байгаа нь гарцаагүй түрүүлээд байх шиг санагддаг юм.
-Чөлөөт цагаараа юу хийх дуртай вэ?
-Мотоцикль унах дуртай. Гэхдээ одоохондоо ганцаараа чаддаггүй л дээ.
-Том болоод ямар мэргэжилтэй хүн болох вэ?
-Уяач болноо, яг л Дашчийрэв агаа шигээ. Сайн уяач  гэж хүмүүс ярьдаг даа. Бидэнд бас их хайртай. “Сайн хүүхэд шүү” гээд л урам өгөх бүрт нь илүү сайн уралдана даа гэж бодогддог юм.
-Шинэ жилийн үдэш өвлийн өвгөнд хүслээ хэлэх бол юу хүсэх вэ?
-Олон айраг түрүү авах юмсан гэж хэлнээ.
-Ярилцсанд баярлалаа. Сайхан баярлаарай. 
Ийнхүү бидний яриа ийнхүү өндөрлөсөн юм. Яриагаа дуусгаад дугаарыг нь асуухад бэлэгний үүргэвчээ задалж байгаад утасны үүрээ гаргаснаа “сая авсан болохоор цээжилж амжаагүй юм” гээд утсаа өглөө. Жаахан биедээ баймгүй хэрсүү, атлаа эгдүүтэй унаачийн ертөнцөөр аялахад ийм байлаа.

П.Ундраа