"Уулс трейд" ХХК-ийн захирал Т.Галбадрах: Шинэ монгол адууг сайжруулж хөгжүүлэх нь манай галын зорилго

-Үхэр жилд одтой сайхан наадсан. Ер нь хэзээнээс морь сонирхох болсон юм бэ?
-Юуны өмнө “Тод магнай” сэтгүүлээрээ дамжуулан Монголынхоо нийт ард түмэнд шинээр гарсан барс жилийн баярын мэндийг хүргэе. Миний хувьд багадаа бусдын адил морь малтай ойр байгаагүй ч Монгол хүний сэтгэлд морь хамгийн ойр байдаг гэдэг утгаараа хардаг л байсан. Харин хурдан морь сонирхож уяж сойх болсон нь Манлай уяач Билэгдэмбэрэлтэй холбоотой. Бид хоёр гэмгүй сайхан найз нөхөд. Тэр хүн л намайг моринд уруу татсан даа. Тэгээд 2007 оноос  хурдан морь уяж, уралдуулж эхлээд улс бүсийн наадмаас хэд хэдэн айраг аваад байна.  АХ-ын 88 жилийн ойгоор  ногоон соёолон маань дөрвөөр давхиж, Завхан аймагт болсон “ Очирвааний хурд-2009 ” баруун бүсийн уралдаанд аман хүзүүдсэн бол хүрэн халзан үрээ маань АХ-ын 87 жилийн ойгоор гуравт , 88 жилийн ойгоор дөрөвт давхилаа. Энэ бол залуу уяачдад тэр болгон тохиолдоод байдаггүй амжилт хэмээн бахархаж байгаа. 
-Амжилт арвинтай залуу уяач маань хаанахын ямар галд харьяалагдаж байгаа вэ? Таны морьдын уяа сойлгыг хэн тааруулж байна?
-“Дорнын унага ” галд харьяалагдаж байгаа. Манай гал 2008 онд МУ-ын Манлай уяач С. Ганхуягаар ахлуулан Дорнод аймгийн Цагаан-Овоо суманд тулгын чулуугаа тавьж байгуулагдсан. МУ-ын Алдарт уяач Э.Ганбат , Аймгийн алдарт уяач Т.Батзориг, Б.Цэндбаатар болон залуу уяач Н.Хүрлээ , ММСУХ-г үүсгэн байгуулагч Пунцагбалжир агсны хүү Энх-Мөнх нарын олон хурдан буяны эзэд болсон 14-15 хүний бүрэлдэхүүнтэй. Сүүлийн үед одтой сайхан нааддаг галуудын нэг болоод байгаа. 
-Шинэ Монгол адууг дэмждэг хүмүүс цугларчээ дээ?
-Тийм шүү. Шинэ Монгол адууг бий болгож , удам угшлыг нь сайжруулан хөгжүүлэх нь  манай галын гол зорилго л доо. Би ч гэсэн өөрийн унаган адуутай болж уралдуулахыг хичээдэг. Энэ ч утгаараа Араб, Англи цусны гурван азарга , цэвэр англи үүлдрийн 4-5 гүү авчихаад үр дүнг нь үзэх гээд хичээж байна. Мөн дээр нь Дорнод зүгийн болон Завханы Тэсийн голын хэдэн сайхан адуутай болсон.
-Удахгүй “ Дүнжингарав” болно. Ямар адуу уяж байгаа вэ?
-Ногоон үрээ бол өнжинө. Хэд хэдэн адуу бий. 
-Бидний урилгыг хүлээн авч ярилцсанд баярлалаа.
-“Тод магнай” сэтгүүлийнхээ хамт олонд ч гэсэн ажлын амжилт хүсье.

"Тод магнай" сэтгүүл дугаар №3