Хуушуурын гор гарсан нь

Дорнод аймгийн Баянтүмэн сумын харьяат уяач Д.Бямба гуай, унаач хүү Б.Ганболд, тэдний хүрэн алаг азаргатайгаа хэрхэн уралдаж хуушуураас болж яаж хөглөсөн тухай та бүхэндээ өмнө нь хүргэж байсан билээ
     Энэ удаад хурдан хүлэг морьтойгоо замбуулинд ганц тохиох  насаа хамт элээсэн өвгөн, гандан бууршгүй залуу наснаа аавынхаа адуутай нөхөрлөсөн заяаг  түшиж ирсэн хүү хоёр тээр жилийн хөгтэй  наадмаасаа хойш олон жил сайхан уралдсан ч  олны амнаас хуушуурын үнэтэй түрүүний тухай нэг л салж өгөхгүй янзтай мэдэрцгээжээ.
   Хүү Б.Ганболд нь 30 жилийн дараа унаган хурдан хээр азаргаа  уяж сойх зуур довтой наадмын зар сэм сонсож байтал 1997 оны намар тус аймгийн Халхгол суманд Халхын хэцүү То ван хэмээх Б.Тогтохтөр ноёны мэндэлсний 200 жилийн наадмын зар зүүн зүгт тархаж уяач бүхэн морьдоо бэлтгэж наадмын өдрийг тэсэн ядан хүлээцгээв.
   Халх даяар цуутай ноёныхоо  ойд айл аймаг, сум орон даяараа нүнжигтэйхэн бэлтгэцгээж, мөн тэр ойд зүүн хязгаарын дархан хилийн мөнхийн харуул болсон Сүмбэрийн отрядын тэгш ой таарав. Хээр азарга нь ч давхил бүрт өнгөлж эзэн хүний сэтгэлийг хөвсөлзүүлэв. Өвгөн уяач Д.Бямба гуай нас дээр гарсан тул хүүгээ морь уяхыг харж баясахаас өөргүй тул том наадамд хүүгээ хээр азаргаа  авч явахад дургүйлхсэнгүй, харин ч аавын бийд газар үз,агтны бийд хүнтэй танилц гэж захиасаа хэлэн аян замд үдэв.
   Ёстой л нөгөө хөлтэй нь хөлхөж, хөлгүй нь мөлхөж түмэн олон ард нь Халхын хэцүү То вангийнхаа ойг тэмдэглэх анхдугаар наадамд хүрэлцэн иржээ. Хурдан азарга мордож газар газрын хурдан тууртууд цугласан наадамд Б.Ганболдын уясан хээр азарга хол тасархай түрүүлэв.
  Хамгийн бахархууштай  нь тус наадамд Ноёны ой, Хилийн цэргийн ойд түрүүллээ гэж хээр азарганы магнайд хос алтан медаль зүүж өгснөөр 30 жилийн өмнө хүрэн алаг азаргаараа авч чадаагүй алтан медаль нэхэн олгогджээ.
  Наадмаас ирээд Б.Ганболд “Аавынхаа авч өгч амжаагүй хуушуурын горыг гаргаж, амьд сэрүүнд нь нэг баярлуулсан даа“ хэмээн инээж явсан юм гэдэг шүү.

Б.Батсайхан