Б.Буянжаргал гурван сард “болзох” дуртай

...Сайхан сэтгэлийн сүмбэр ууланд
Сарнай цэцгийн хүрээлэн байлаа
Гоо хатдын тэр л цэцэрлэгт
Гоёмсог бүсгүйн нэг нь байдаг
 Зүүдний тэнгэрт уянга дуугаа өргөсөн
 Саяана гэдэг урангоо байдаг... Бөхийн өргөөнөө энэ сарын 5-нд болсон СТА, дуучин Б.Буянжаргалын “Хайраа дуу болгон өргөе” тоглолтын эхлэл энэ байлаа. 2010 онд анхны цомгоо гаргаж, жилийн дараа “Санахгүй л гэсиймаа” тоглолтоо Монгол бөхийн өргөөнд гуравдугаар сарын 3-нд хийж байсан тэрээр “Хайраа дуу болгон өргөе” тоглолтоороо үргэлжлүүлсэн нь энэ юм. Нийтийн дууны бүлд анх СТА Пүрэвсүрэнгийн ая, Минжингийн шүлэг “Санахгүй л гэсиймаа” дуугаараа хүч түрэн  орж ирсэн тэрээр өдгөө олон олон хитийн эзэн болсон байх ажээ. “Миний л үзэсгэлэн гоо”, “Аавын борлог морьд”, “Ай даа юу ч гэхэв дээ”, “Зүүн голын Гүнжмаа”, “Алтан үст”, “Саяана” гээд л.  СУИС-ийн хөөмийн ангийг төгссөн тэрээр МУСТА Одсүрэн багшийн шавь. Монголын анхны мэргэжлийн хөөмийчид  болсон тэдний ангийн өс үүгээрээ их бахархдаг.
 “Хайраа дуу болгон өргөе” тоглолтонд МУГЖ Галсантогтох, Эрдэнэцэцэг, СТА дуучин  Хосбаяр нар уригдан ая дуугаа өргөцгөөсөн юм. Бөхийн өргөөг ойрын үед  болоогүйгээр олны хөлд даруулж орхисон энэ тоглолтын хүндтэй зочид түүний аав Батсайхан, ээж Долгормаа, авга ах МУСТА Мөнхбат, СУИС-ийн багш Одсүрэн, Төв аймгийн ЗДТГ-ын төлөөлөгчид байлаа. Төв аймгийн ЗДТГ-аас  нутгийн дуучин хүүдээ  Төв аймгийн байгалийн сайхныг харуулсан уран зургаар бэлэг барисан юм. Харин дуучин Буянжаргал энэ үдэш урлагийн замд хөтлөн оруулсан авга, багш, аав ээждээ чин сэтгэлийн талархлаа илэрхийлж, “Хайраа дуу болгон өргөж” буйгаа өгүүлсэн билээ. Энд сонирхуулахад  түүний ах Мөнхбат бүжигчин хүн. “Анх энэ ахыгаа дагаад СУИС-ийн дуулаачийн ангид конкурс өгөхөөр очлоо. Тэгсэн сургуулийн үүдэнд анхны мэргэжлийн хөөмийн ангид элсэлт авч байна гэсэн зарлал гарсан байхыг олж хараад ахтай зөвлөлдөж байгаад шалгалт өгч тэнцээд хөөмийн ангид орсон” юм хэмээн тэрээр дурсан ярьдаг. 
Буянжаргалын хувьд 3 сарыг илүүд үздэг. Анхны бие даасан тоглолтоо гурван сард хийсэн, түүнээс яг жилийн дараа бяцхан охинтой болсон гээд л түүний амьдралын баяр жаргалтай мөчүүд хаврын урь орсон  энэ л өдрүүдтэй салшгүй холбоотой байдаг гэх юм билээ. Тиймдээ ч энэ удаа гурван сарыг сонгон фенүүдтэйгээ болзсон нь энэ байлаа. Тиймээ, үзэгчид түүнийг дэндүү сайн мэддэг бололтой. Дуулсан дуу бүрийг нь хүч нэмэн түрэх үзэгчид сэтгэл өег нэгэн үдшийг өнгөрүүллээ.

 П.Ундраа