Унаган хүлгийн амжилт-Уясан эзний алдар

Унаган адуугаараа наадах уяачийн эрхэм бахархал. Тэр тусмаа зэлэн дээр нь навч гундтал, нар хүлхэж аргамжлагдсан унаган хүлэг дээд насны ангилалд түрүүлж айрагдах нь дээл багадаж, дэлхий ганцадсан аархал. Чухам тийм бахархалд хүлэгдэн аархаж явсан хоймор нутгийн нэгэн уяач бол Төмөрбулаг сумын уугуул, аймгийн Алдарт уяач Баадайн Лэгшигдорж юм. Тэсийн голын хүлгийн тэнхээ юуг таниулж, Хотгойдын хурдан хүлгэдийн хийморь лундааг сэргээх зорилготой хангайн бүсийн хурдан морьдын уралдаанд  түүний унаган хонгор морь айргийн гуравт хурдалж шадар вангийн унаа шандастайг нотлон харуулсан юм. УИХ-ын гишүүн Ц.Даваасүрэн нарын нутгаа гэсэн сэтгэлтэй хурдан моринд ээлтэй эрхмүүд санаачлан “Хотгойдын хурд” хангайн бүсийн наадмыг дэлтэй цэнхэрийн орноо зохион байгуулсан 2007 оныг эрхэм уншигчид санаж буй бизээ.Засгийн газрын тогтоолт хангайн бүсийн наадмын их насны морьдын уралдаанд эх орны дөрвөн зүг, найман зовхисоос ирсэн 600-гаад хурдан ажнай тоосоо өргөн шандас шалгаж Төв аймгийн Батсүмбэр сумын уугуул Тод манлай уяач Ц.Батсайханы сартай хүрэн түрүүлж, Баянхонгор аймгийн Баян-Овоо сумын уугуул, аймгийн Алдарт уяач Д.Дүгэрсүрэнгийн шар цоохор аман хүзүүдэн, айргийн гуравт Баадайн Лэгшигдоржийн хонгор морь тус тус хурдалсан билээ. Ийнхүү нутгийн дэвжээнээ нүүр тахалж айраг амсуулсан хонгор морь Б.Лэгшигдорж Алдартын унаган хүлэг. Бүр тодруулбал хадам эцэг Дашзэвэгийнх нь жороо алаг гүүний анхны төл юм. Харин эцэг хээр азарга нь Бүрэнтогтох сумын адуу гэдэг юм билээ.
Хонгор морь дааган цагаасаа эхлэн уягдан соёолон хүртлээ Төмөрбулаг сумынхаа наадамд тасралтгүй түрүүлэн том довны тэнхээт хүлэг болохоо батлан харуулсан билээ. Ажил ихтэй эзнийхээ завыг тааруулан байж аймгийн баяр наадамд айрагт багтан хурдалсан. Дараа нь бас ахиж  “Дархад хурд” наадамд даамай хол түрүүлэн уясан эзнээ унах машинтай болгож байсан дуулиант хүлэг юм.
18 жил уяан дээрээ дэгж, 18 наадмын дэнж юуг чимсэн хонгор морь эзнээ унах унаа, дуурсах цолтой болгож өгсөн буянт хүлэг бөгөөд ирэх жил “Хотгойдын хурд-3” уралдаанд мордон зодог тайлах гэнэ лээ.

А.Тэлмэн