Унаач Г.Сүхбат: Өчигдөр шүдлэн айрагдуулж, өнөөдөр хүрэн морио түрүүлгэлээ

Их монгол улс байгуулагдсаны 807  жил, Үндэсний их баяр наадмын их насны морьдын уралдаанд Тод манлай уяач Х.Бат-Эрдэнийн хүрэн морь хоёр дахиа түрүү магнайд хурдалсан юм. Хүрэн морийг 2012 оны шилдэг, “Од” гал уяаны хурдан морь унаач Гансүхийн Сүхбат хоёр дахиа жилээ ийнхүү хурдлууллаа.  Ингээд бяцхан унаачтай ярилцсанаа хүргэе.
-Хүрэн морио түрүүлгэлээ. Баярын сэтгэгдлээс хуваалцаач?
-Гоё байнаа. Өчигдөр шүдлэнд Х.Бат-Эрдэнэ ахынхаа хүрэн үрээ айргийн таваар хурдлуулсан. Харин өнөөдөр хоёр дахь удаагаа хүрэн морио улсын наадамд түрүүлгэлээ. Баярлаж байна.

-Хэдэн настай вэ? Хурдан морь унаад хэдэн жил болж байна.
-Одоо би найман настай. Намайг таван настайд аав маань морь унахыг зааж өгч байлаа. Түүнээс хойш хурдан морь унаж байна. Энэ хугацаанд олон айраг түрүү авсандаа баярладаг шүү.
-Аав нь морь уядаг уу?
-Үгүй ээ. Морь уядаггүй л дээ, гэхдээ мал малладаг. Миний аавыг Гансүх, ээжийг Улаанаа гэдэг. Одоо Партизанд амьдарцгаадаг юм.
-Хэзээнээс “Од” галын унаач болсон юм бэ? 
-Манай ах Сэргэлэнбаатар Монгол улсын Манлай уяач Б.Бат-Өлзий ахын морийг унадаг байсан юм. Одоо 15 нас хүрээд хасагдаад, туслах уяач болчихсон. Би ахыгаа дагаж яваад л хурдан морины унаач болсон юм. Ах маань анхны “Их хурд”-аар ногоон морийг унаж зургаалуулж байсан.
-Аль сургуульд сурдаг вэ? Чөлөө их авч байна уу?
-Би Өлзийт хорооллын 59-р сургуулийн Цэцэгдэлгэр багштай хоёрдугаар ангид сурдаг. Хааяа уралдаан гээд чөлөө авах үе гардаг ч олон бишээ.
-Танай ангид унаач хүүхдүүд байна уу?
-Сайн мэдэхгүй байнаа. Гэхдээ нас бага гэлтгүй бидний дунд хааяа морины тухай ярина өрнөнө гээч. Энэ нь надад сонирхолтой санагддаг.
-Том болоод ямар мэргэжилтэй болох вэ?
-Би чинь  дөнгөж л хоёрдугаар ангиа төгсөж байна. Тийм болохоор одоохондоо мэргэжлээ сонгоогүй ээ.  Өдөр бүр л өөр өөр мэргэжилтэй болмоор байдаг. Нэг өдөр уяач болмоор ч юм шиг, маргааш нь  босс болбол бас гоё санагдаад байдаг юмаа.
-Хурдан морь унах гоё уу?
-Тэгэлгүй, үнэхээр гоё шүү. Тэр тусмаа түрүүлээд ирэх. Бариа ойртоод л, үзэж байгаа хүмүүс уухайлаад л, бөөн баяр болсон уяач ах баяр хүргээд л гоё шүү. Тиймдээ ч би баяруудаас улсын наадамд их дуртай.
-Хүсэл бүхэн тань биелэх болтугай. Дүүдээ баярлалаа.

 П.Ундраа