Н.Түвшинбаяр харцага нутгийн олонтойгоо баярлав

Тулгар төрийн 2222, Их Монгол улс байгуулагдсаны 807, Ардын хувьсгалын 92 жилийн ойн үндэсний их баяр наадмын хүчит бөхийн барилдаанд аймгийн арслан Н.Түвшинбаяр зургаа давж, Монгол улсын харцагуудын эгнээнд багтсан билээ. Олимпийн их наадмаас алт, мөнгөн медаль хүртэж монгол түмнээ баярлуулсан Хөдөлмөрийн баатар энэ сарын 8-нд харцага цолны мялаалга наадмаа төрсөн нутаг Булганы Сайхан сумнаа хийлээ. Их насны морьдын уралдаанаар эхэлсэн шинэхэн харцагын наадамд Хөвсгөл, Архангай, Орхон, Төв, Булганы уяачид хурдан хурц хүлгэдээ мордуулсан юм. Их нас, азарга, дааганы гурван насны түрүүлж айрагдсан морьдын бай шагнал 30 сая төгрөг болжээ.
Харин албан ёсны нээлтийг уртын дууны шуранхайгаар эхэлж, энэ өдрийн “гол баатар”-т хаягласан талархлын үгстэй, бэлгийн цуваа үргэлжилсэн юм. Монгол улсын заан Өсөхбаяр, фото зурагчин Ганбат нарын найзуудаас нь 10 сая төгрөгийг бэлэглэсэн бол Булган аймгийн ИТХ-ны шийдвэрийн дагуу харцага цолны мялаалга болгож, долоо сая төгрөгийг гардууллаа. Мөн Сайхан сумын Засаг даргын тамгын газраас “миний нутгийн газар шорооноос бурхан гуйсан ч бүү өг гэдэг ч Түвшинбаяр аваргаасаа харамлахгүй” хэмээгээд Хунтын рашаан сувиллын зориулалтын нэг га газрыг бэлэглэлээ. Сумын төвөөсөө 25 км-д орших тус рашаан сувилалд бөхчүүд наадмын бэлтгэлдээ гарцгаадаг бөгөөд ийнхүү шинэ харцага ч бэлтгэлээ базаах нь бололтой. Анхдагчдын өлгий Булган аймгийн Сайхан сумаас  МУ-ын начин Ганбаатараас хойш 16 жилийн төрсөн харцага нь Түвшинбаяр аварга болж байгаа юм. Энд сонирхуулахад аваргын үндэсний бөхийн анхны багш нь Ганбаатар начин байсан гэдэг юм билээ.
Ийнхүү нутгийн олонтойгоо баяраа хуваалцсан Н.Түвшинбаяр хүн эмнэлэгтээ УАЗ 469 машин бэлэглэж, сумынхаа мэндийн салбарт хөрөнгө оруулалт хийсэн юм. Мөн наадамд ирсэн бүх хүүхдүүдэд аваргын гэр бүлээс гарын бэлгээр баярлуулав. Ийнхүү шинэхэн харцагын наадам дуу хууртай, нартай хуртай болж өндөрлөлөө.

А.Мөнх