Унаач М.Анхбилэг: Дүү бид хоёр аавынхаа уясан морьдыг унаж хурдлуулдаг

Энэ удаагийн бяцхан унаачдын түүчээг Хөвсгөл аймгийн унаач М.Анхбилэг үргэлжлүүлж байна. Дүүтэйгээ хамт аавынхаа уясан морьдыг унаж хурдлуулдаг бяцхан хүү ирээдүйд эмч болох мөрөөдөлтэй.

-Анхбилэг унаач том болоод ямар мэргэжилтэй болох вэ?
-Эмч болноо. Үүний тулд одооноос хичээж хичээлээ шамдан хийж байгаа. Энэ хавар тавдугаар ангиа төгсөхдөө 13 хичээлээр шалгалт өгсөн. Би 10 хичээлдээ 100 хувь А авч, гурван хичээлд 95-97 оноотой төгссөн.
-Тийм үү мундаг юм аа. Хичээлдээ онц сурахаас гадна өөр ямар авьяастай вэ?
-Манай аав уяач хүн. Тийм болохоор дүү бид хоёр аавынхаа уясан морьдыг унаж хурдлуулдаг юм. Би 12 настай, миний дүү Анхбаатар 9 настай. Сая та нарт ярилцлага өгсөн дөө. Би чинь морь унана, бас даам тоглож, дуу дуулах дуртай. Сүүлд сургуулийн урлагийн үзлэгээр “Юндэн Гөөгөө”-г дуулсан.
-Танай ангид морь унадаг хүүхэд олон уу?
-Гурав л бий. Хааяа бид гурав чинь хурдан морины тухай хөөрхөн яриа өрнүүлнэ ш дээ. Уралдсан уралдааныхаа тухай ярина.
-Хаана, хаана ямар амжилттай уралдаж байв?
-Би одоо 10 гаруй айраг түрүүтэй. Зургаан настайгаасаа морь унаж эхэлсэн. Өөрийнхөө хээр морийг аав уяж би унаад Их-Уул сумынхаа наадамд аман хүзүүдүүлсэн. Анхны айраг байгаа юм. Дараа нь энэ хээр морь маань сумынхаа наадамд нэлээд хэд хэдэн удаа айрагдсан. Унасан морио айраг түрүүнд хурдлуулах сайхан шүү. Миний унаж байсан морьдоос хамгийн хурдан нь Мягмаржавын буурал байсаан. Та бодоод үз дээ. Нэг зун 10 удаа уралдахад, 9 түрүүлж, нэг айрагдсан. Хурдан байгаа биз. Бас нэг 10 гаруй медальтай хээр морь байна. Ийм морьдыг унахад цаанаа л гоё байдаг юм.
-Нэг өдөр  хэдэн насны морь унадаг вэ?
-Миний хувьд дээд тал нь дөрвөн насны морь унаж байсан.
-Хамгийн холдоо хаана очиж наадаж байв?
-Одоохондоо Эрдэнэбулган орж наадсан маань л хамгийн хол нь байх шив дээ.
-Уралдааны замд унаач хүүхдүүдэд хамгийн хэцүү нь юу байдаг вэ?
-Гарах гэж байхад машинаар хөөх хэцүү ш дээ. Бүгд л нэг зүгт тэмүүлж байхад машин ороод ирэхээр эмээх зүйл гардаг юм. Бас өвөл хаврын уралдаануудад зам халтиргаатай байх нь амаргүй л дээ.  Тэрнээс хүмүүсийн яриад байгаа шиг гар хөл даарна гэсэн ойлголт байдаггүй. Харин сүүлийн үед гарааны төхөөрөмжтэй уралддаг болсон нь сайн зүйл гэдэг нь мэдэгдээд байгаа шүү. Түүнээс өмнө бол бараг л дуртай зүгтээ гараад явчихдаг байсан.

-Ярилцсанд баярлалаа. Дүүдээ амжилт хүсье.

П.Ундраа