Владимирын хүнд ачааны үүлдэр

Владимирын хүнд ачааны үүлдрийг 1944 онд Иванов, Владимир мужуудад бий болгожээ. Аж үйлдвэрийн төв хотуудад тээвэрт хэрэглэх том адууны хэрэгцээ их байсан явдал нь энэ үүлдрийг гаргахад их ач холбогдол үзүүлсэн болно. Урьдын Владимир губерний тариачид өөрсдийн адууг анхандаа хатирч адуу, арден, першерон адуугаар сайжруулж байгаад хожим нь өнгөрсөн зууны 90-ээд оноос эхлэн клейдесдаль үүлдрийг гол сайжруулагч үүлдэр болгон авсан юм. 1886 онд Гаврилов дүүрэгт улсын адууны байр байгуулагдсан ажээ.
Иванов, Владимир мужид тариачдаас адуу үржүүлэх ажил нь таваарын ба үржлийн хосолмол чиглэлээр явагдаж иржээ. Аугаа их Октябрийн хувьсгалын дараагаар адуу үржүүлэгчдийн нөхөрлөл байгуулагдаж, 1936 онд Улсын үржлийн сан байгуулагдан ажиллаж эхэлсэн юм. Тэгэхдээ клейдесдаль, нутгийн адуу хоёрын эрлийзийг шинэ үүлдэр гаргах журмаар үржүүлэх тохиромжтой хэв байдлыг бататгах явдал нь тэрхүү Улсын үржлийн сангийн бүсэд адуу үржүүлэх үндсэн гол арга болж байв. Түүнчлэн адууг сайн тэжээх, тээвэр ба хөдөө аж ахуйн ажилд эдэлж ашиглах нь Владимирын хүнд ачааны үүлдрийг бий болгоход ихээхэн ач холбогдол үзүүлсэн болно.
Владимирын хүнд ачааны үүлдрийн адуу хатингар том толгойтой, цэх шулуун буюу ялигүй монхордуу хамартай, уртавтар бөгөөд хангалттай гүн биетэй, нуман хавиргатай, булчинлаг өргөн нуруутай, тааруухан налсан хондлойтой, хангалттай хатингар хөл мөчтэй, урт налуу далтай, үс хялгас багатай байна. Клейдесдаль адууг бодвол их хатингар, нягт бие цогцостой бөгөөд сөдрөгөөр өвчлөх нь бага байдаг. Үндсэн зүс нь хээр, зээрд байх ба бор зүс ховор тохиолдоно. Азарганы биеийн дундаж хэмжээг см-ээр үзүүлвэл:
Мундааны өндөр 161
Биеийн ташуу урт 166
Цээжний бүслүүр 193
Шилбэний бүслүүр 23.8
Энэ адуу ачаа даац ихтэй. Тухайлбал, Гаврилов дүүргийн улсын адууны байранд  байсан Легион гэгч азарга /Ландыш гэгч азарга ба Лилия гэгч гүүний төл/ 16413 кг ачаа даасан бөгөөд 450 метр газрыг дөрвөн минут 35.5 секунд явсан болно. 1955 оны БХХАА үзэсгэлэнгийн аварга Мудрец гэгч азарга 13800 кг ачааг чирч байжээ. Энэ адуу хөдөө аж ахуйн элдэв төрлийн ажилд их бүтээл гаргадаг. Жишээлбэл: “Новая жизнь” хамтралд нэг мориор өдөрт дунджаар 0.75 га газар хагалдаг. Владимирын хүнд ачааны үүлдрийн адуу хурдан өсөх шинжээр сайн бөгөөд 1.5 настайдаа 500 кг жин дарна. Энэ адууг тэжээхдээ хүчит тэжээл бага өгч бүдүүн тэжээлийг түлхүү хэрэглэнэ. Владимирын хүнд ачааны үүлдэр нь Иванов, Владимир мужуудаас гадна Тамбов муж ба Татар АССР-т нутгийн адууг сайжруулагч болж тархжээ.