Түнхэлд болсон барилдаан

Сэлэнгэ аймгийн Мандал сумын Түнхэл тосгонд “Дэвжээ сурталчилах барилдаан” амжилттай болж өндөрлөлөө. Барилдааныг тосгоны захирагч Раднаабазар нээж үг хэлсэн бөгөөд барилдаанд у.з Б.Соронзонболд, у.х Т.Өсөх-Ирээдүй нар хүрэлцэн очсон бол нутгийн ахмад бөхчүүд болох а.з Г.Баатарсүрэн, а.н Р.Чотон, с.з Т.Ганболд тэргүүтэй бөхчүүд уригдан ирж залуу хүчтэнүүдийнхээ барилдааныг сонирхсон юм.
Барилдаанд а.х.а Б.Одгэрэл, а.а Б.Батжаргал, а.а Ж.Алтаншагай, а.х Б.Бат-Өлзий нарын тэргүүтэй хүчит 56 бөх хурд хүч авхаалж самбаагаа сорин барилдав. Бөхийн барилдааны нэгийн даваанд Сэлэнг аймгийн харьяат залуу бөх Х.Наранбаяр с.з Б.Эрдэнэванг мушгиад, улсын наадмын өсвөрийн барилдааны шөвөгт үлдэж байсан Э.Бат-Эрдэнэ Говь-Алтай аймгийн харьяат, с.х Я.Бумбаярын хөлд ороод тус тус давжээ.
Хоёрын даваанд Э.Бат-Эрдэнэ а.а Ж.Алтаншагайтай хайн унаж дахин барилдаад шороодсон бөгөөд шилдэг арслантай зоригтой сайхан барилдаж нутгийн олноо баясгасан байна.
Гурвын даваанд с.з Х.Хүрэл-Эрдэнэ а.х Б.Бат-Өлзийгийн хөлд орж нэлээд шуугиулаад унасан бгөөд уран барилдааны шагналын эзэн болсон байна. А.н.н Н.Баярбаатар а.н Д.Төрболдыг хутгахад сөрж мушгиад давав. Мөн энэ даваанд сумын шилдэг заан Э.Даш сумын заан Э.Батхуягтай тунан барилдаж сэнжигний барьцнаас татаад өвдөг шороодуулжээ.
Дөрвийн даваанд хурц арслан эрэмбээрээ гоц мөргөж, с.з Э.Даш а.а Б.Батжаргалыг дагуулж хөмрөөд, а.н.н Н.Баярбаатар а.а Ж.Алтаншагайг барьц сонгож, а.н.н Н.Энхжаргал а.х Б.Бат-Өлзийг хутгаж тус тус давсан байна.
Их шөвөгт хурц арслан Б.Одгэрэл а.н.н Н.Баярбаатарыг амлаж хөлд нь орж дэрлэж дараад давсан бол тунасан хоёрын барилдаанд а.н.н Н.Энхжаргал хашиж мордон давж үзүүрт үлджээ.
Үзүүр түрүүний барилдаанд хурц арслан өөрийн дархан сугадаж мушгих мэхээрээ давж түрүү бөхөөр тодорчээ.
Барилдааны үеэр Түнхэл тосгоны харьяат, Хайрхан буянт ХХК захирал Пүрэвдорж Таван хан бөхийн дэвжээнд таван хантай гэр хандивлаж амжилт хүслээ.
Оноолтыг 3-ын даваанаас сонирхоно уу.

3-ын даваа
1. а.х.а Б.Одгэрэл - с.з С.Оргилбаатар
2. а.а Б.Батжаргал - с.з Баяртогтох
3. а.а Ж.Алтаншагай - с.з Г.Ганхөлөг
4. а.х Б.Бат-Өлзий - с.з Х.Хүрэл-Эрдэнэ
5. а.н.н Н.Энхжаргал - а.н М.Жаргалсайхан
6. а.н.н Н.Баярбаатар - а.н Д.Төрболд
7. с.з Э.Даш-с.з Батхуяг

4-ийн даваа
1. а.х.а Б.Одгэрэл - гоц мөргөв
2. а.а Б.Батжаргал - с.з Э.Даш
3. а.а Ж.Алтаншагай - а.н.н Н.Баярбаатар
4. а.х Б.Бат-Өлзий - а.н.н Н.Энхжаргал

5-ын даваа
1. а.х.а Б.Одгэрэл - а.н.н Н.Баярбаатар
2. а.н.н Н.Энхжаргал - с.з Э.Даш

6-ийн даваа
1. а.х.а Б.Одгэрэл - а.н.н Н.Энхжаргал

МУИС-ийн оюутан Т.Түмэндэмбэрэл