“Тод магнай” сэтгүүлийн шинэ дугаар гарлаа

Илчит наран саатан, энэ дэлхий сэргэдэг хавар цаг айсуй. Нялх төлийн цангинаан хот айлыг хөгжөөх урин цагийн мэндийг  уншигч танаа дэвшүүлье.
Морьтон монголчуудын мөнхийн омогшлыг дэврээн, мориор дамжсан үндэсний өв соёлыг хойч үедээ түгээн дэлгэрүүлэх их зорилгыг өвөртөлсөн сэтгүүлийн маань 50 дахь дугаар эрхэм таны өмнө дэлгээстэй байна.
2009 оны 11 сард анхны дугаараа өргөн барьж асан редакцийн хамт олон дөрвөн жил гаруйн турш уншигч танаа өөрсдийн бүтээлээ илгээжээ. Модон морин жилд таван нас хүрч буй “Тод магнай” сэтгүүлийн энэ удаагийн дугаараар Ардын хувьсгалын 92 жилийн ой, Үндэсний их баяр наадамд /аймгуудын баяр наадамд/ түрүүлж, айрагдсан хурдан хүлгэдийг танилцуулахаар зэхлээ. Бид өмнө нь түүхт 90 жилийн ойгоо тэмдэглэн, Засгийн газрын тогтоолт зуны бүсийн наадмуудыг амжилттай зохион байгуулсан Архангай, Хэнтий, Завхан, Төв зэрэг аймгийн айргийн морьдыг  танилцуулсан бол энэ удаа бусад 17 аймгийн баяр наадмын сониныг дуулгаж байна.
Дэнж хотойттол наадах дэлхийд ганцхан дэлгэр Монголын баяр наадамд хэний хүүгийн ямар хурдан хүлэг түрүүлж, айрагдан, нутаг нугын түмний мэлмийг баясгасныг та бүхэн энэ удаагийн дугаараас тольдоорой. 

Эрхэм уншигч та бүхэн сэтгүүлээ “Интер”, “Мир”, “Номин” их дэлгүүрийн салбарууд, “Билэг” их дэлгүүрийн номын дэлгүүрүүдээс худалдан авах боломжтой. Мөн 91115114, 9509-2992 дугаарын утсаар холбогдон авч болох юм.