Алдартын мялаалга, аргагүй хурдан Толбот хүрэн

Хоймор нутгийн нэрийг дуурсган төрийн наадамд  алтан жолоо өргүүлсэн анхны /Д.Хишигбатын хонгор морины түрүүг албан ёсоор тооцдоггүй/ хүлэг бол Монгол Улсын Алдарт уяач Гордоогийн Доржпүрэвийн хүрэн үрээ юм.
...Түмний эхийн шуранхайд
Асрын цацаг намирч
Түмэн агтны туурайнаас
Нарны тоос босно
Тоос тоосны дундаас
Торойн гарч тодрох нь
Толбот хүрэн үрээ мөнөөс мөн буй заа
Хашир уяачийн эрдмээр хурд хийморь нь ирлэгдсэн газар газрын шандаст 304 хүлгээс хоймор нутгийн шинэхэн Алдарт Гордоогийн Доржпүрэвийн хүрэн үрээ  18 км замыг 26 минут 9 секундэд туулан АХ-ын 91 жилийн ойн баяр наадмын анхны түрүүгээр тодорсон билээ. Төрийн  наадмын түрүү хүрэн үрээгээ Г.Доржпүрэв Алдарт “Толбот” хэмээн нэрийддэг бөгөөд ММСУХ-г үндэслэгч, Монгол улсын Алдарт уяач У.Буяндэлгэрийн  Жинст хонгор азарганы төлийн төл хэмээдэг. Бүр тодруулбал, У.Буяндэлгэр Алдарт Толбот хүрэн азаргаа хүү Батхуягт  нь “Хөвсгөл нутаг, та бүхэн хурдтай болог” хэмээн бэлэглэсэн гэдэг. Сайн санааны үзүүрт шар тос гэдэгчлэн билэг бодож өгсөн хүрэн азарга  Г.Доржпүрэв Алдартынд ирээд олон сайхан хурд төрүүлсний нэг нь төрийн наадмын түрүү хүрэн хязаалан аж. Эцгийн шийрийг хатаах хурд төрлөө хэмээн бэлгэшээсэн Г.Доржпүрэв хүрэн үрээндээ Толбот  хэмээх нэрийг хайрлан, төрийн наадамдаа зорин ирж алтан жолоо атгасан нь  хуучраагүй түүх.  Хөх тэнгэрийн хүчтэн луу жилд ийнхүү одтой наадсан Толбот хүрэн могой жилийн өнгө тольдох анхны уралдаанд ч гэсэн амжилттай наадан аман хүзүүнд хурдалсан. Гэсэн хэдий ч “Дүнжингаравын хурд-2013” уралдааны үүлдэрлэг байдалд хяналт тавих тусгай комиссынхон эрлийз гэсэн шалтгаанаар амжилтыг нь тооцохоос татгалзсан юм. Хүрэн үрээ хэдхэн хоногийн дараа Эрдэнэт хотод болсон хаврын бүсийн уралдааны эрлийз ангилалд уралдан 12-оор давхиж энэ цагийн эрхгүй хурдан буянгуудын нэг гэдгээ батлан харуулсан билээ. Хөрст дэлхий нялхарч, хөх ногоо суунаглан адуу тургилж айраг шуугисан наадам айсуй. Алдартын мялаалга аргагүй хурдан ажнай Толбот хүрэн уяан дээрээ дүүхэлзэнхэн байна...

А.Мөнх