“Хангарьд-2014” уралдааны хөтөлбөр

Улаанбаатар хотын Морин спорт уяачдын холбооноос энэ сарын 14-нд Хүй долоон худгийн Цагаан хөтөлд "Хангарьд 2014" уралдаанд зохион байгуулахаар болсон. Тэгвэл  өчигдөр нийслэлийн Морин спорт уяачдын холбооны тэргүүн  М. Мөнхбаясгалан болон уг уралдааныг зохион байгуулах комиссын дарга Д.Очирсүрэн нар мэдээлэл хийлээ.
Нийслэлийн хурд бага гурван насны уралдаан нь энэ жилээс Хангарьд нэртэйгээр  зохион байгуулагдаж байгаа билээ. Тодруулбал, хязаалан, шүдлэн, даага болон эрлийз дааганы уралдаан болно. Эрлийз морьдыг Монгол морьдоос ялгахдаа сэрвээний өндөр болон үүлдэрлэг байдал /гадаад төрх/-ыг харах юм байна. Ялгаж уралдах саналыг НМСУХ-ны тэргүүлэгч гишүүд 100 хувь дэмжсэний үндсэн дээр ийм шийдвэрийг гаргажээ. Гэхдээ эрлийз морьдын уралдаанд цэвэр цусны болон импортын бага насны морьдыг уралдуулахгүй гэдгийг зохион байгуулах комиссоос мэдээлсэн юм. Энэ уралдааны онцлог нь морьд нэг талдаа уралдана. Өмнө нь барианы зурхайгаас гарааны зурхай хүртэл  явуулж  эргүүлдэг байсан бол энэ удаад зөвхөн гараанаас бариа руу уралдах юм. Гарааны газар морьдоо мордуулсан уяач барианы зурхайд очихгүй бөгөөд барианы газар өөр хүн тосч авна. Морьд гараанд гарснаас хойш барианд орох хүртэл гарааны зурхай болон бариа хоорондын замын хоёр урсгалыг хаана. Тухайн нас уралдсаны дараа  унаач хүүхдүүдийг барианы зурхайгаас гарааны зурхай руу нэгдсэн  автобусаар зөөвөрлөн хүргэнэ. “Хангарьд-2014” хаврын уралдааны бүртгэл энэ сарын 13-нд Цагаан хөтөлд болно.
Уралдааны хөтөлбөр
1.Хязаалан насны морь мордож гарааны төхөөрөмжид орох 06.30-07.30 цагт
Хязаадан морь гараанаас гарч уралдахад 08.00 цаг
Хязаалан насны морьд барианд орох 08.30 цаг
2. Шүдлэн  насны морь мордож гарааны төхөөрөмжид орох 10.30-11.30 цагт
Шүдлэн  морь гараанаас гарч уралдах 12.00 цаг
Шүдлэн  насны морьд барианд орох 12.30 цагт
3. “Хангарьд-2014” хаврын уралдааны нээлт 13.00-13.30 цаг
4. Монгол даага  мордож гарааны төхөөрөмжид орох 14.00-14.30 цагт
Монгол даага гараанаас гарч уралдах 15.00 цаг
Монгол даага барианд орох 15.30 цагт
5. Эрлийз даага мордож гарааны төхөөрөмжид орох 16.30-17.00 цагт
Эрлийз  даага гараанаас гарч уралдах 17.30 цаг
Эрлийз  даага барианд орох 18.00
6. Түрүүлж, айрагдсан морьдыг цоллох 18.30
Дашрамд дурдахад, хязаалан нас 10 км-ээс уралдах бол шүдлэн  8, монгол болон эрлийз  даага 6 км-ээс уралдах юм байна.
Ц.Амарбаяр