Нийслэлийн тэргүүн магнай хүлгэд буюу "Хангарьд-2014" уралдаанаас

Нийслэлийн Морин спорт уяачдын холбооноос жил бүр зохион байгуулдаг  "Нийслэлийн хурд" бага гурван насны уралдаан энэ жилээс "Хангарьд" нэртэйгээр зохион байгуулагдаж буй.  "Хангарьд-2014" уралдаан Дүнжингарав хаврын бүсийн наадмын маргааш болж 20 гаруй аймгийн 300 гаруй хүлэг тоосоо өргөн, зохион байгуулалт сайтай  болж өндөрлөлөө . Энэ жилийн уралдаан нэг талдаа уралдсан, хамгийн олон эрлийз хассан гээд онцлох зүйл олонтой наадам байв. НМСУХ-ны 20 шахам тэргүүлэгч, хөдөө аж ахуйн мэргэжилтнүүд  сэрвээний өндөр, харагдах байдлаар нь эрлийз, монголыг хүсвэл ялгаж болдгийг  жишээ болгон тодхон харууллаа. Гарааны төхөөрөмжинд сэрвээний өндөр болон үүлдэрлэг байдлаар нас бүрээс 20 гаруй үрээ хасаж, уралдаж  ирсэн хойно нь айрагдсан морьдоос сэрвээний өндөр нь хүрэхгүй ч харагдах байдлаар эрлийз гэснийг нь хассан юм. Улс болон бүсийн уралдаанд айрагт баригдаж байсан морьдыг уяачид болон комиссын гишүүдийн зоримог шийдвэрээр эрлийз гэдгийг нь тогтоож  хасаж байлаа.
Эрлийз морьдоо монгол моринд уралдуулаад айрагдуулж, түрүүлгэж сурчихсан зарим уяач комиссын шийдвэрийг эсэргүүцэж  байсан ч морины комисс шийдвэртээ баттай зогссон юм. Эдний дунд ганц нэг монгол үрээ уралдалгүй хасагдаж хэлмэгдсэн  байхыг үгүйсгэхгү й. Ямартаа ч НМСУХ цэвэр монгол морь уралдуулна гэсэн шийдвэрээ хэрэгжүүлж чадсан. “Хангарьд-2014" уралдаанд  уяачид болон наадамчдын сэтгэл өөдрөг, жил бүр эрлийзээ ингэж ялгаж уралдуулах юм бол хөдөөнөөс ирэх уяачдын тоо ихэсч наадмын цар хүрээ өргөн болно гэдгийг илэрхийлж байлаа. "Дүнжингаравын хурд-2014" , "Хангарьд-2014" уралдаанд морины ноён оргил цолд хүрсэн Тод манлай, Манлай, МУ-ын Алдарт уяач цолтой олон уяач хүрэлцэн ирсэн байсан ч Тод манлай уяач Ц.Батсайхан, Х.Бат-Эрдэнэ болон МУ-ын Алдарт уяач Т.Батцоож  нар л төр түмнээс хайрласан залаатай малгай, захтай дээлээ өмссөн байлаа. Тод манлай уяачдаас эхлээд олон Манлай, Алдартууд шаахай углаж савхи нөмөрсөн нь газрын хүлгийг тэнгэрийн жигүүртэн болгодог уяач хүний  их эрдмийг нь биширч, хөдөлмөрийг нь хүндэтгэдэг, морио дээдэлдэг морьтон түмнээ хүндлээгүйн илрэл, залуу хойч үедээ үлдээх буруу үлгэр жишээ байлаа.                                     

Нийслэлийн тэргүүн магнай хүлэг шалгаруулах “Хангарьд-2014“ хязаалан насны уралдаанд 100 гаруй хурдан хүлэг тоосоо өргөснөөс:
1 . Ховд аймгийн Мянгад сумын уяач Загджавын Мэндсайханы Чонон саарал   
2 . Дундговь аймгийн Хулд сумын уугуул,аймгийн Алдарт уяач Дэмчигцоодолын Эрболдын хонгор   
3 .Дундговь аймгийн Хулд сумын уугуул, МУ-ын Алдарт уяач Бандиагийн Баярсайханы алаг
4 . Дорноговь аймгийн Улаанбадрах сумын уяач Доржпүрэвийн  Баярсайханы хээр
5 .Баянхонгор аймгийн Баянбулаг сумын уяач Жадамбаагийн Мөнх-Эрдэнийн хар

Шүдлэн 80 гаруй :
1. Дорноговь аймгийн Сайншанд сумын уугуул, сумын Алдарт уяач Нямбаатарын шарга
2. Өвөрхангай аймгийн Баян-Өндөр сумын уугуул П.Төмөр -Очирын хээр
3. Төв аймгийн Цээл сумын уугуул, МУ-ын Алдарт уяач П.Баяраагийн зээрд халзан
4. Төв аймгийн Цээл сумын уугуул, МУ-ын Алдарт уяач П.Баяраагийн хонгор
5. Дархан-Уул аймгийн харьяат Бат-Эрдэнийн хар
Даага /монгол/100 шахам:
1 .Ховд аймгийн Чандмань сумын уугуул, "Чонон саарал" галын уяач Нэргүйн саарал
2 .Улаанбаатар хотын Хан-Уул дүүргийн уяач Амарсанаагийн хар
3. Говь-Алтай аймгийн Бигэр сумын уугуул, МУ-ын Алдарт уяач Л .Батмөнхийн хээр
4 . Дундговь аймгийн Луус сумын уугуул Э .Пүрэвдоржийн загал
5. Завхан аймгийн Цэцэн-Уул сумын харьяат Амарсанаагийн сартай хонгор
Даага/эрлийз/30 гаруй:
1 .Төв аймгийн Бүрэн сумын уяач Х.Улам-Өрнөхийн хээр
2 . Төв аймгийн Алтанбулаг сумын харьяат Нямсүрэнгийн өсгий цагаан хээр
3 . Ховд аймгийн Дарви сумын уугуул,  нийслэлийн Алдарт уяач Ү.Атарсайханы сартай хар
4. Төв аймгийн Баянцогт сумын уугуул, Тод манлай уяач Д .Мөнхбатын хээр
5 .Говь-Алтай аймгийн Бигэр сумын харьяат МУ-ын Алдарт уяач Л. Батмөнхийн хүрэн халзан тус тус айрагдлаа.
Ц.Амарбаяр