Хоёр Пүрэв түрүү, үзүүрт хүч үзлээ

Нийслэлийн Багахангай дүүргийн Ардчилсан нам байгуулагдсаны 25 жилийн ойд зориулсан үндэсний бөхийн барилдаан боллоо.
Энэхүү барилдаанд у.з Б.Соронзонболд, у.х Н.Батсуурь, у.ө.и.н Ж.Отгонбаяр, у.н Л.Гантулга, Р.Пүрэвдагва, Б.Пүрэвсайхан нараар манлайлуулсан хүчит 64 бөх барилдав. Сумын цолтнуудаас Хөвсгөл аймгийн Бүрэнтогтох сумын заан Г.Балжинням, Төв аймгийн Баян сумын заан Б.Дагвадорж нар нэг давж хоёрын даваанд заан харцага нар шороодов. Хоёрын даваанд а.х.а Ч.Батчулуун а.н.н Ц.Ганбатыг мордоод, а.а С.Ерөөлт а.х А.Мөнхтүшигийг мушгиад, а.а Ч.Ганзориг а.х Ч.Бүрэнзэвсэгийг хөлийг нь авч тойрч эргээд, а.а Ш.Дарханбат а.х Б.Төрмагнайг татаж мордоход мэдэрч сөрж хутгаад, а.а М.Бадарч а.а Б.Уугандавааг хөмрөөд тус тус давлаа. Гурвын даваанд у.з Б.Соронзонболд а.а Ж.Сүхбатаар хоёр давсан а.х Д.Батсүхийг амлаж хонгодоод давсан бол у.н Л.Гантулга а.а Ш.Дарханбатыг хутгачихав. Мөн а.а Ч.Батчулуун а.а Ж.Алтаншагайг бярдаж мушгиад давлаа.
Оноолтын даваанд а.а Б.Эрдэнэхүү у.з Б.Соронзонболдыг хавирахад сөрж алхаад, а.х.а Ч.Батчулуун у.х Н.Батсуурийг гар уургалж даацтай мушгиад, у.н Б.Пүрэвсайхан у.ө.и.н Ж.Отгонбаярыг давхар шуудагнаас түрээд буцааж зайлаад тогтонгуут шахаж татаад, тус тус давав.
Их шөвөгт начин Р.Пүрэвдагва хурц арсланг амлаж түрж хөөгөөд дутуудангуут буцааж зайлж эргээд, у.н Б.Пүрэвсайхан а.а Б.Эрдэнэхүүг давуулж гуядахад сөрж хонгодоо маягтай түрж хөөгөөд тус тус давав.
Үзүүрт үлдсэн хоёр Пүрэв аргагүй сайхан барилдаж буйгаа нотлон ийн үзүүр шалгарлаа. Тэдний хувьд тун удахгүй болох начин цолтны халз барилдаанд үзэгчдийн хамгийн их сонирхол татаж буй залуус билээ. Тэдний барилдаан төд удсангүй баруун талдаа шахаж татаад давснаар у.н Б.Пүрэвсайхан түрүү бөхөөр тодров.
Оноолтыг гурвын даваанаас үзнэ үү.
Гурвын даваа
1. Б.Соронзонболд у.з - Д.Батсүх а.х
2. Н.Батсуурь у.х - М.Бадарч а.а
3. Ж.Отгонбаяр у.н - Б.Мөнх-Эрдэнэ а.з
4. Л.Гантулга у.н - Ш.Дарханбат а.а
5. Р.Пүрэвдагва у.н - П.Баярхүү а.з
6. Б.Пүрэвсайхан у.н - Ч.Ганзориг а.а
7. Ч.Батчулуун а.х.а - Ж.Алтаншагай а.а
8. С.Ерөөлт а.а - Б.Эрдэнэхүү а.а
Дөрвийн даваа
1. Б.Соронзонболд у.з - Б.Эрдэнэхүү а.а
2. Н.Батсуурь у.х - Ч.Батчулуун а.х.а
3. Ж.Отгонбаяр у.н - Б.Пүрэвсайхан у.н
4. Л.Гантулга у.н - Р.Пүрэвдагва у.н
Тавын даваа
1. Р.Пүрэвдагва у.н - Ч.Батчулуун а.х.а
2. Б.Пүрэвсайхан у.н - Б.Эрдэнэхүү а.а
Зургаагийн даваа
1. Р.Пүрэвдагва у.н - Б.Пүрэвсайхан у.н

МУИС-ийн оюутан Т.Түмэндэмбэрэл