“Уралдаанч хүүхэд-2014” сургалт зөвлөгөөн зохион байгуулагдлаа

Монголын морин спорт, уяачдын холбоо 2014 оны 10 дугаар сарын 25-ны өдөр Хан-Уул дүүргийн 14 дүгээр хороо буюу Өлзийтөд байрлах 10 жилийн 59 дүгээр дунд сургууль дээр “Уралдаанч хүүхэд-2014” сургалт, зөвлөлгөөнийг амжилттай зохион байгууллаа.
Хан-уул дүүргийн  59 дүгээр дунд сургуульд нийтдээ 100 гаруй уралдаанч хүүхэд суралцдаг ба сургалт зөвлөлгөөнд Монголын морин спорт, уяачдын холбооны Ерөнхий нарийн бичгийн дарга Пүрэвийн Сэргэлэн, ММСУХ-ны Тэргүүлэгч гишүүн, Монгол Улсын Тод Манлай уяач Цэвээнжавын Дуламсүрэн,  НМСУХ-ны Тэргүүн Мэндбаярын Мөнхбаясгалан болон Ажлын албаны бүрэлдэхүүн, мөн 59 дүгээр сургуулийн менежер Х.Байгальмаа, 70 гаруй уралдаанч хүүхэд хамрагдан оролцлоо.
“Уралдаанч хүүхэд-2014” сургалт, зөвлөлгөөнөөр Монгол Улсын стандартын шаардлага хангасан хамгаалалтын хувцас, хэрэглэлийг танилцуулсан баримтат кино үзүүлэн,  стандартад нийцсэн хамгаалалтын хувцас, хэрэглэл хэрэглэхийн ач холбогдол, зөв зохистой хэрэглээний талаар тайлбарлан танилцуулж, уралдаанч хүүхдийн эрх, үүрэг, мөн уралдааны үеэр осол гэмтлээс урьдчилан сэргийлэх талаар зөвлөгөө, зөвлөмж өгч, хүүхдүүд чөлөөтэй ярилцан санал бодлоо илэрхийллээ. 
Энэ үеэр Монголын морин спорт, уяачдын холбооны Ерөнхий нарийн бичгийн дарга Пүрэвийн Сэргэлэн, 59 дүгээр сургуулийн сургалтын менежер н.Байгальмаа нар уралдаанч хүүхдийн суралцах, хүмүүжих нөхцлийг сайжруулах, тэдний авьяас чадварыг хөгжүүлэх чиглэлээр хамтран ажиллахаар харилцан тохиролцож санамж бичигт гарын үсэг зурсан юм. Сургалт, зөвлөлгөөний төгсгөлд 59 дүгээр сургуулийн аввяаслаг уралдаанч хүүхдүүд дуулж, бүжиглэж, шүлэг уншиж өөрсдийн авьяасыг сонирхуулан оролцогчдод бэлэг барилаа.
Монголын морин спорт, уяачдын холбоо өөрийн нийгмийн хариуцлагын хүрээнд 10 уралдаанч хүүхдийг Олон улсын Найрамдал төвд амрах эрхийн бичгээр, тус сургуулийн 35 багшийг ОХУ-ын Улан-Үд хотын Итгэлт хамбын хийд руу аялуулахаар шийдвэрлэснийг уралдаанч хүүхдүүд, 59 дүгээр сургуулийн багш, сурган хүмүүжүүлэгчид баяртайгаар хүлээн авсан юм.
“Уралдаанч хүүхэд-2014” сургалт, зөвлөлгөөнийг Ариунбилэг захиралтай “ХААН СҮҮ” ХХК, Б.Батбаяр захиралтай спортын “СҮЛД” ТВ-ийн хамт олон ивээн тэтгэж хамтран ажилласан бөгөөд уралдаанч хүүхдийн аюулгүй байдлыг бүрэн хангахад хамгаалалтын хувцас, хэрэгслийн зөв хэрэглээг танилцуулж, ММСУХ болон 59 дүгээр сургууль хоорондын хамтын ажиллагааны эх үндэс тавигдсан өндөр ач холбогдолтой байлаа.