Он дараалан төрсөн олны мэдэх Арслангууд-Пүрэвийн Бүрэнтөгс

Залуучуудын улсын аварга шалгаруулах барилдаанд илүүрхэн түрүүлсэн Бүрэнтөгс хүү аймаг цэргийн цолтны барилдаанд айлгаж эхэлсэн нь тун саяхан мэт. Гэсэн хэдий ч долоо, найман оныг ардаа үджээ. Аймаг цэргийн цолтонд залуу бөх шөвгөрөөгүй удсан цагт Бүрэнтөгс шөвгөрч байлаа. Мөн улсын цолтны барилдаанд ч шуугиан тарьж цөөнгүй цолтныг давж байв. Улмаар аймгийн начин цолд хүрч, улсын цолтны барилдаанд их шөвөгт шалгаран барилдаж байлаа. Гэвч аймгийн баяр наадамд түрүүлж амжихгүй явсаар 2010 оны Баян-Өлгий аймгийн 70 жилийн ойн даншигт найм даван түрүүлж арслан цолтой болов. Аймгийн арслан цол хүртсэнээс хойш улсын цолтны барилдаанд хэд хэдэн удаа их шөвөгт шалгарсан бөгөөд 90 жилийн ойн наадмаар улсын цолд хүрнэ хэмээн тааварлаж байсан боловч Ховдын Ч.Цогбаярт өвдөг шороодож наадам өндөрлөв.
Улсын наадмын доор даваанд унасан алдаагаа засахаар залуу арслан бэлтгэл сургуулилтаа сайн хийж барилдсаар 2012 оны наадмын сорилго барилдаанд заан Ч.Санжаадамбыг орхин шөвгөрч бэлтгэл жигд сайхан байгаагаа харуулсан юм. Улмаар улсын баяр наадмаар хоёрын даваанд а.х.а О.Гантулгатай таарч мордож дайраад давсан бол гурвын даваанд нутгийн бөх, ахмад аварга О.Балжинням амлан барилдаж тахимаа өгөв. Дөрвийн оноолтод залуу аварга С.Мөнхбаттай оноолт таарч сугадаж мушгих дархан мэхэнд нь орсон ч тун сайхан тогтож үлдээд давснаар начны даваанд барилдах болов. Тавын даваанд өөрийг нь гол төлөв давдаг улсын заан М.Өсөхбаярт амлуулж тун богино хугацаанд төвөггүй давснаар “Монгол улсын начин” цолд хүрлээ. Зургаагийн даваанд начин Э.Энхбаттай тунан барилдаж мордон давсан бол зааны даваанд Завханы М.Баяржавхлан гарьдыг давж заан цолны болзол хангав. Их шөвөгт улсын арслан Г.Эрхэмбаярыг мөн мордож давснаар төрийн наадмын үзүүрт шалгарах нь энэ. Урд жилийн төрийн наадмын их шөвгийн гурван бөхийг орхиж наадамчдын сэтгэлийг эрхгүй огшоосон билээ. Үзүүр түрүүнд туршлагатай гарьд Рагчаатай барилдаж мөн л мордох мэхээрээ давснаар төрийн наадмын түрүү бөхөөр тодорч “ Монгол улсын арслан” болсон билээ. Харин наадамд түрүүлснийхээ дараагийн хоёр жил дөрвийн нугалаанд шороодож тааруухан барилдав. Магадгүй залуу хүн биеэ барьц цэнэсэн тал байж болох ч бэртэл гэмтэл ч нөлөөлж байгаа болов уу. Гэсэн хэдий ч залуу арслан маань ард олноо хүндэтгэн аль ч барилдаанд барилдсаар байна. Ахиад түрүүлэх арал бяр, нас түүнд дүүрэн бий. Хэрхэхийг цаг хугацаа харуулна.
Т.Түмэндэмбэрэл