Хээлтүүлгийн үеийн арчилгаа маллагаа

Дан байран маллагаанд байдаг азарганд нийлүүлгийн үед нугын чанар сайтай үетэн алаг өвс, буурцагтан голлосон ногоон өвс өгөх нь тохиромжтой бөгөөд бэлчээрийн ногоог өдөрт 20-25 кг хүртэл хадаж өгөх бөгөөд цэвэр агаар, нарны гэрлээр хангагдах, чөлөөт хөдөлгөөнтэй байлгахад түүний биеийн эсэргүүцэл, эрүүл мэнд сайжирсан болно.Нийлүүлгийн үе өнгөрмөгц байран маллагаатай азарганд бэлчээрийн чанар сайтай ногоог сайн ашиглуулахын зэрэгцээ азарганы тарга хүчний байдлаас хамааран хүчит тэжээлийг бага зэрэг нэмж өгөх нь дараагийн нийлүүлэгт сайн бэлтгэгдэх боломжтой.
Үржлийн азаргыг ялангуяа байран маллагаатай үед өдөрт 30 минутаас 1 цаг хүртэл зохих хугацаагаар цэвэр агаарт зугаалуулах, 2-3 км унаж явах ажлыг өдөрт өгөх тэжээл, идэшлэлтэнд нөлөөлөхгүйгээр зохицуулан зохион байгуулах нь онцгой чухал бөгөөд нийлүүлгийн үед ч хөнгөн ажилд богино хугацаагаар унах буюу сул 1-2 км газар явуулж салхилуулж байх нь чухал юм.
Азарганы нийлүүлгийн үе өнгөрсөнөөс хойшхи дулааны улиралд аль болох чанартай ногоон өвсийг голлон идүүлж, азарганы тарга хүчнээс хамаарч хүчит, шүүст тэжээлийг хасаж аль болох эрүүл, агаар нар  салхинд чөлөөтэй байлгаж арчилгаа маллагааг нарийн тохируулах шаардлагатай. Мөн азарга, гүүний нийлүүлгийн үед ороо нь бүрэн гүйцэд илэрсэн эрүүл гүүг тохиржтой байршлаар буюу бэлтгэсэн зогсоолд авчран гишгүүлэх хэрэгтэй.
 Байран маллагаатай нөхцөлд байгаа үржлийн азаргыг нийлүүлгийн бус үед сард 2 удаа, нийлүүлгийн үед 7 хоногт 1-ээс доошгүй удаа мал эмнэлгийн үзлэгт хамруулж холбогдох арга хэмжээг тухай бүрт нь авч хэрэгжүүлж байх нь чухал юм. Ялангуяа хөдөлгөөн багатай байран маллагааны нөхцөлд сард 1 удаа глюкозын 5-20 хувийн уусмал, 0,9 хувийн физиологийн уусмал, тус бүрийг 1,1 литр , витамины комплексийг 10 мл-ээр тооцож судсаар тарих шаардлагатай.
 Сайжруулагч үүлдрийн азаргыг 10-р сарын 20-ноос эхлэн өвлийн байранд оруулж маллах бөгөөд тухайн өдрийн цаг агаараас шалтгаалан 2-4 цаг гадаа хашаанд гаргаж аль болох чөлөөлтэй хөдөлж байх нөхцлийг хангах хэрэгтэй. Уг адууны өвлийн байр нь бага хэмжээний халаалттай, дотроо ус тэжээлийн онгоцтой эрүүл ахуйн дараахь шаардлагуудыг хангасан байвал зохино.
Үргэлжлэл бий...