Л.Мишигдоной Мэргэн 1948 оны наадмын харваанд хоёронтоо түрүүлжээ

Энэ оноос эхлэн сум орон нутгийн ардууд наадам хийж бөх барилдуулах, морь уралдуулах болсон гэдэг. АХ-ын 27 жилийн ойн улсын баяр наадамд 512 бөх зодоглосноос Ш.Батсуурь арслан хоёр дахь удаа түрүүлэн “Улсын идэр залуу аварга”, найм давж мөн хоёр дахиа үзүүрлэсэн Г.Цоодол заан “Улам нэмэх идэр залуу арслан” цол хүртжээ.
Хурдан морины уралдааны азарганд О.Санжаасүрэн /Төв.Баянцагаан/-гийн цавьдар, их насанд А.Гомбо /Төв.Бор-Өндөр/-ын хүрэн, соёолонд Гаанжуур /Төв.Баянцагаан/-ын хар, хязааланд Жамсран /Төв.Баянцагаан/-гийн хул, шүдлэнд Санжаа /Хэнтий.Галшар/-гийн хул хонгор, дааганд Нямсүрэн /Төл.Баянцагаан/-гийн зээрд түрүүлжээ.
Үндэсний сурын харваа:
1. Л.Мишигдоной /Төв.Лүн/-19
2. Г.Дэмчиг /Дорнод.Халх гол/-17
3. Б.Дамдин /Сэлэнгэ.Дулаанхан/-16
4. Ш.Ишчогдов /Төв.Дэлгэрхаан/
5. ..........
1948 онд буюу АХ-ын 27 жилийн ойн улсын их баяр наадмын харваанд Төв аймгийн Лүн сумын уугуул Л.Мишигдоной хоёр дахь удаагаа түрүүлж одоогийнхоор Хошой мэргэн цолны болзол хангасан байдаг. Тэрбээр гурван жилийн өмнө 1945 онд түрүүлэхдээ 15 оносон бол энэ удаа 19 оножээ.
Улсын мэргэн Мишигдоной нь улсын наадмын  харваанд хоёронтоо түрүүлж, гурвантаа айрагдсан нь бий. Сийрүүлбээс,
1951 оны наадмаар 15 онож тавдугаар байр
1952 1953 оны наадмаар тус тус дөрөвдүгээр байр эзэлсэн байна.
Мишигдоной мэргэн өөрөө сур харваад зогсохгүй шинэ залуу харваачдыг төрүүлэх, сурын спортыг олон нийтэд таниулах, үүх түүхийг нь судалж сурвалжлахыг эрхэмд үзэж байсныг АХ-ын 30 жилийн ойгоор буюу 1951 онд хэвлүүлэн түгээсэн “Монголын сур харвалтын тухай” ном тэргүүтэн нь гэрчилдэг. Энэхүү товхимол нь манай улсын хувьд сур харвалтын тухай өгүүлсэн анхны гарын авлага болсон гэж үзэх үндэстэй юм. Учир нь Манж автономитын үед гаргасан сур харвалтын дүрэм, сурын тухай хууль зүйлийн бичигт дурдсан зарлиг сэлтээс өөрөөр гарын авлага болохуйц товхимол байгаагүй болой.
Хошой мэргэн маань 1960-аад оны эхээр өгүүлсэн нэгэн яриандаа:
-Феодалын засгийн үед эрийн цээнд хүрмэгц зодог шуудаг өмсгөн бөхийн аманд гаргах, нум сум өгч сур харвуулах нь албан журмын хэрэг байсан. би 18 наснаас сур харвасан. Ардын засгийн үед улсын их баяр наадмын сурын тэмцээнд бараг жил бүр оролцон таван удаа түрүү байр эзэлсэн. Энх-Амгалан хааны үед тогтоосон журмын дагуу харваач 12 хүн нэг баг болж 45 алд зайд харвадаг байх үеэс Арван засгийн наадам, Хэнтийн цайлгын сурын харвалтанд ч оролцож явлаа... гэсэн нь бий. Үнэхээр ч тэрбээр насан туршаа сур харвасан бөгөөд 76 насны босго алхчихаад ахуйдаа ч сум тоолон онож хурсан олны талархлыг хүлээж байсан талаар нэг бус удаа дурдагдан тэмдэглэгдсэн байдаг билээ.
Анианханы Хүрэн-Алагийн Отгонбаяр