2014 оны чансаа өндөр их насны морьд

1. Хорин жилийн унага уралдан уяачийн эрдэм ухааныг шалгадаг их насны морьдыг амжилтаараа тэргүүлсэн хурдан ажнай бол Үндэсний их баяр наадам, Их Монгол Улс байгуулагдсаны 808, Ардын хувьсгалын 93 жилийн ойн баяр наадамд түрүүлж, “Их мандал-3” төвийн бүсийн уралдааны айргийн  тавд хурдалсан Хэнтий аймгийн Галшар сумын уугуул  Аюушийн Амарбатын хул морь юм. Хул морь өнөө жилийн уралдаануудынхаа амжилтаар нийт есөн оноо цуглуулж, жагсаалтыг тэргүүлжээ.
2. Чансаа өндөр морьдын хоёрдугаарт найман оноогоор төрийнхөө их баяр цэнгэлд аман хүзүүдэж,  “Хотгойдын хурд-3” хангайн бүсийн уралдаанд түрүүлсэн Орхон аймгийн Баян-Өндөр сумын харьяат, аймгийн Алдарт уяач Доржийн Баясгалангийн Суман хүрэн бичигдсэн байна.
3. 2014 оны улс, бүсийн наадмуудаас нэг түрүү, таван айраг хүртэн амжилт дүүрэн наадсан Улаанбаатар хотын Сонгинохайрхан дүүргийн харъяат, аймгийн Алдарт уяач Өлзийнхутагийн Пүрэвбаатарын бор  морь долоон оноогоор гуравт бичигджээ. Хурдны өлгий Сүхбаатар нутгийн унаган хүлэг АХ-ын 93 жилийн ойд айргийн гуравт хурдлан давхар уяагаар  “Хотгойдын хурд-3” хангайн бүсийн наадамд аман хүзүүнд давхисан юм.
4. Жагсаалтын дөрөвдүгээрт дөрвөн оноогоор Дундговь аймгийн Хулд сумын уугуул, “Инэл” ХХК-ийн захирал, аймгийн Алдарт уяач Сосорын Мөнхбатын хүрэн морь бичигджээ. Уясан эзний магнайг тэнийлгэж, унасан хүүхдийн урмыг тэтгэсэн хүрэн морь АХ-ын 93 жилийн ой төрийн их баяр цэнгэлд  айргийн дөрөв, “Их мандал-3” төвийн бүсийн уралдаанд аман хүзүүнд тус тус хурдалсан юм.
5. АХ-ын 93 жилийн ой төрийн наадамд айргийн таваар давхиж, Ламын гэгээн Лувсанданзанжанцаны мэлмий гийсний 370 жилийн ой, говийн бүсийн уралдааны айргийн гуравт хурдалсан Архангай аймгийн Эрдэнэбулган сумын уугуул Гончигжавын Мөнхсайханы хүрэн морь долоон оноогоор чансаа өндөр морьдын тавдугаарт жагсчээ.
6. Зургадугаар байрт зургаан оноогоор “Дүнжингаравын хурд-2014” хаврын бүсийн уралдаанд айргийн тав,  “Их мандал-3” төвийн бүсийн уралдаанд айргийн  гуравт хурдалсан Дундговь аймгийн Луус сумын уугуул, аймгийн Алдарт уяач Сэрээгийн Шинэбаатарын хээр морь бичигджээ.
7. Шинэ оны өнгөө шинждэг “Дүнжингаравын хурд-2014” хаврын бүсийн уралдаанд магнайдаа тоосгүй түрүүлсэн Өмнөговь аймгийн Цогт-Овоо сумын уугуул Санжаатогтохын Төгөлдөрийн буурал морь дөрвөн оноогоор жагсаалтын долоод бичигдсэн байна.
8. Говь-Алтай аймгийн  Баян-Уул сумын уугуул Монгол Улсын Тод манлай уяач Дагвадоржийн Ганбаатарын шарга морь дөрвөн оноогоор наймдугаар байрт шалгарсан байна. Хурдан шарга Ламын Гэгээн Лувсанданзанжанцаны мэлмий гийсний 370 жилийн ой, говийн бүсийн уралдааныг тэргүүлсэн юм.
9. Төр нийгмийн нэрт зүтгэлтэн Галдан бошигт хааны мэндэлсний 370 жилийн ой, баруун бүсийн уралдаанд түрүүлсэн Говь-Алтай аймгийн Халиун сумын уугуул, МУ-ын Алдарт уяач Туваанжавын Гантөмөрийн хээр морь дөрвөн оноогоор есдүгээрт эрэмбэлэгдсэн байна.
10. 2014 оны чансаа өндөр их насны морьдын аравдугаарт “Дорнод талын хурд-2014” зүүн бүсийн уралдааны түрүү Дорнод аймгийн Хөлөнбуйр сумын харъяат, сумын Алдарт уяач  Түвдэнгийн Энхцогтын саарал, "Их мандал-3” төвийн бүсийн уралдааны түрүү Дундговь аймгийн Хулд сумын уугуул, аймгийн Алдарт уяач Пүрэвдоржийн Болдын хүрэн, “Өвөрхангай-2014” хангайн бүсийн хаврын уралдааны түрүү Өвөрхангай аймгийн Тарагт сумын уугуул Ойдовын Цэрэнсодномын сартай хүрэн морьд тус тус дөрвөн оноогоор бичигдсэн байна.