2014 оны өндөр чансаатай уралдаанчид

1.Унасан хүлгээ түрүүлгэж, айрагдуулан урамтай сайхан наадсан хийморилог хүүхдүүдийн тэргүүн эгнээнд “Түмний эх” галын уралдаанч Сэлэнгэ аймгийн Цагааннуур сумын дунд сургуулийн зургадугаар ангийн сурагч Чогдонгийн Бямбажав улс, бүсийн уралдаанаас нэг түрүү, долоон айраг хүртсэн амжилтаараа бичигджээ. Тэрээр 22 оноо цуглуулсан юм.
2.”Унаган хурд” галын уралдаанч Хан-Уул дүүргийн Цэцээ гүн цогцолборын 59 дүгээр дунд сургуулийн есдүгээр ангийн сурагч Алимаагийн Алтанхуяг улс, бүсийн уралдаанаас нэг түрүү, зургаан айраг хүртсэн амжилтаараа 21 оноогоор удаах байранд бичигджээ.
3. Харин улс, бүсийн уралдаанаас гурван түрүү, дөрвөн айраг хүртэн 20 оноо цуглуулсан “Дорнын унага” галын уралдаанч Архангай аймгийн Цэцэрлэг сумын  нэгдүгээр дунд сургуулийн  зургаадугаар ангийн сурагч  Бат-Очирын Дэмбэрэлдодов гуравдугаар байрт бичигдсэн байна.
4. Дөрөвдүгээр байрт Улаанбаатар хотын  Баянгол дүүргийн Сант сургуулийн тавдугаар ангийн сурагч “Түмний эх” галын уралдаанч Батбилэгийн Буяндэлгэр улс, бүсийн наадмаас нэг түрүү, таван айраг хүртэн 18 оноогоор шалгарчээ. Ийнхүү аав хүү хоёр 2014 оны шилдгүүд боллоо.
5. Улс, бүсийн наадмаас нэг түрүү, дөрвөн айраг хүртэн 17 онооны эзэн болсон Төв аймгийн Батсүмбэр сумын дунд сургуулийн наймдугаар ангийн сурагч, “Босоо хүлэг” галын уралдаанч Отгонбаатарын Намхайнямбуу шилгүүдийн жагсаалтын тавдугаарт бичигдсэн байна.
6. Улс, бүсийн уралдаанаас нэг түрүү, долоон айраг хүртэн 17 оноо цуглуулсан Хан-Уул дүүргийн Цэцээ гүн цогцолборын 59 дүгээр дунд сургуулийн зургадугаар ангийн сурагч, “Хүй мандал” галын уралдаанч Пүрэвийн Доржрагчаа 2014 оны шилдэг унаачдын зургаад бичигджээ.
7. Харин жагсаалтын долоод Хан-Уул дүүргийн 118 дугаар сургуулийн наймдугаар ангийн сурагч, “Макс” галын уралдаанч Цасхүүгийн Отгонхундага улс, бүсийн уралдааны гурван түрүү, хоёр айргийн амжилтаараа буюу 17 оноогоор бичигдсэн байна.
8. Улс, бүсийн уралдаанаас хоёр түрүү, гурван айраг хүртэн 16 онооны эзэн болсон Дорнод аймгийн Цагаан-Овоо сумын дунд сургуулийн дөрөвдүгээр ангийн сурагч, “Дорнын унага” галын уралдаанч Батсайханы Рагчаа наймдугаарт байрт оржээ.
9. Чансаа өндөр уралдаанчдын есдүгээрт улс, бүсийн уралдаанаас хоёр түрүү, гурван айраг хүртсэн Дорноговь аймгийн Сайншанд сумын хоёрдугаар дунд сургуулийн долдугаар ангийн сурагч Ням-Эрдэнийн Чинбат 15 оноогоор багтжээ.
10. 2014 оны шилдэг уралдаанчдын нэгээр Хан-Уул дүүргийн Өлзийт хорооллын дунд сургуулийн гуравдугаар ангийн сурагч “Ажнай” галын уралдаанч Галсандоржийн Сүлдбаяр улс, бүсийн уралдааны хоёр түрүү, хоёр айргийн амжилтаараа багтжээ.
Унасан хүлгээ түрүүлгэж, айрагдуулан амжилт үзүүлсэн нийт уралдаанч хүүхдэдээ “Тод магнай” сэтгүүлийн хамт олны өмнөөс халуун баяр хүргэж, спортын өндөр амжилт хүсье. 

Б.Долзодмаа