“Шувуун саарал” МСУХ-ны шилдгүүд тодорлоо

Төв аймгийн Баяндэлгэр сумын уяачдын холбоо долоон жилийн өмнө байгуулагдсан бөгөөд энэ оны тавдугаар сард хурлаа хийж, удирдах бүрэлдэхүүнээ шинэчлэн сонгосон юм.  Шинэчлэгдэн зохион байгуулагдсан холбооныхон сумаасаа төрсөн улсын начин Д.Батчулууны цолны мялаалганд зориулсан уралдааныг амжилттай зохион байгуулсан төдийгүй уяачдаа улс, бүсийн уралдаануудад амжилттай оролцуулж эхэлсэн билээ.
Тус холбооны хурал 12 дугаар сарын 20-ны өдөр болж,  өнгөрсөн хугацаанд хийсэн ажлаа хэлэлцэж, Холбооны дүрэм, 2015 оны ажлын төлөвлөгөөгөө баталж, Хяналтын зөвлөлөө шинэчлэн сонгосон. Мөн нутгаасаа төрсөн их зохиолч Д.Нацагдоржийн алдартай бүтээлүүдийн нэг “Шувуун саарал”-ын нэрээр холбоогоо нэрлэхээр шийдвэрлэлээ.
“Шувуун саарал”  МСУХ-ны 2015 оны шилдгээр дараах уяачид болон уралдаанч хүүхдүүд тодров.
Оны шилдгийн шилдэг уяачаар Дундговь аймагт зохион байгуулагдсан төвийн бүсийн уралдаанд хурдан хүрэн азаргаа айргийн гуравт хурдлуулсан Н.Загдрагчаа
Шилдэг залуу уяачаар Төв аймгийн баяр наадам, Эрдэнэ болон Сэргэлэн сумдын 90 жилийн ой, Багануур дүүрэг, Баяндэлгэр сумын наадам, “Монгол Жоки” клубын уралдаан болон хаврын уралдаануудаас 16 түрүү, айраг авсан Санжаасүрэнгийн Мөнгөнбаяр
Шилдэг ахмад уяачаар хурдан хонгор азаргаа  Багануур, Баяндэлгэрийн наадмуудад айрагдуулсан А.Үржин
Шилдэг уралдаанчаар Б.Балжинням, М.Цэрэннадмид, Э.Мөнхгэрэл, М.Ирээдүй, Э.Яндагбанди нар тус тус тодорлоо. Мөн “Шувуун саарал” уяачдын холбооны нэрэмжит шагналаар ахмад уяач Ё.Балжинням, залуу уяач Б.Мөнхсүх нар шагнагдав.
“Шувуун саарал” МСУХ