Улсын шилдэг уралдаанч хүүхдүүд

ММСУХ 2014  оноос эхлэн орон нутгийн шилдэг уяач, уралдаанч хүүхдүүдийг шалгаруулдаг уламжлалыг тогтоогоод байгаа. Уясан морио түрүүлгэж, айрагдуулан наадамчин олноо цэнгүүлсэн 2014 оны шилдэг уралдаанч хүүхдүүдийг эрхэм уншигч танаа танилцуулъя. 
Архангай: Булган сумын уугуул Энхтайваны Энхтамир аймгийнхаа шилдэг уралдаанчаар шалгарлаа. Тэрээр улс, бүс, аймгийн баяр наадмаас гурван түрүү, гурван айраг хүртжээ.
Булган: Хангал сумын уугуул Тайваны Сэргэлэн  нь бүсийн наадмаас нэг түрүү, аймаг, сумдын наадмаас хоёр түрүү, есөн айраг хүртжээ.
Баянхонгор:Баянцагаан сумын уугуул Сүрэнжавын Энхтөр хүү шалгарчээ.Тэрээр бүсийн наадмаас нэг түрүү,  аймаг сумдын наадмаас дөрвөн түрүү, гурван айраг хүртсэн байна.
Баян-Өлгий:Буянт сумын уугуул Даваадоржийн Батзаяа хүү аймгийн наадмаас нэг түрүү,нэг айраг хүртсэн амжилтаараа бусдыгаа хошуучилжээ.
Говь-Алтай: Есөнбулаг сумын уугуул Батмөнхийн Сарангэрэл бүсийн уралдаанаас хоёр айраг, аймаг сумын наадмаас нэг түрүү, дөрвөн айраг хүртсэн амжилтаараа Алтай нутгийн шилдэг уралдаанчаар шалгарчээ.
Говьсүмбэр: Сүмбэр сумын уугуул Баярсайханы Ганбаяр аймаг, сумын уралдаанаас найман айраг хүртэн шилдгээр тодорсон байна.
Дархан-Уул: Дархан сумын уугуул Хашчулууны Чинбат хүү аймаг, сумын уралдаанаас дөрвөн түрүү 10 айраг хүртэн улсын шилдэг уралдаанчаар шалгарсан байна.
Дорноговь: Сайншанд сумын уугуул Ням-Эрдэнийн Чинбат хүү АХ-ын 93 жилийн ойн баяр наадам болон бүсийн уралдаанаас долоон түрүү, аймаг, сумын уралдаанаас хоёр түрүү, дөрвөн айраг хүртэн бусдыгаа хошуучилсан байна.
Дорнод: Халхгол сумын уугуул Хилийнчулууны Учрал оны шилдэг уралдаанчаар шалгарлаа. Энэ бяцхан охин зүүн бүсийн уралдаанаас хоёр айраг хүртэн, сумын наадмаас хоёр түрүү, нэг айраг авчээ.
Дундговь: Адаацаг сумын уугуул Сүхбаатарын Батхүү АХ-ын 93 жилийн ой үндэсний их баяр наадам болон бүсийн уралдаанаас нэг түрүү, хоёр айраг, сумын уралдаанаас зургаан айраг хүртэн оны шилдгээр шалгарсан байна. Ийнхүү аав, хүү хоёр нэг дор шилдгүүд боллоо. /Аав Сүхбаатар нь мөн оны шилдэг уяач болсон/
Завхан: Алдархаан  сумын уугуул  Намсрайн Мягмарсүрэн аймаг, сумдын уралдаанаас есөн түрүү, 12 айраг хүртэн хутагтын нутгийн уралдаанчдыг тэргүүлжээ. 
Орхон: Баян-Өндөр сумын уугуул, алдарт Суман хүрэнгийн унаач Долгорсүрэнгийн Мөнх-Отгон АХ-ын 93 жилийн ой үндэсний их баяр наадам болон бүсийн уралдаанаас нэг түрүү, нэг айраг хүртэн шилдгээр шалгарсан байна.
Өвөрхангай: Хайрхандулаан сумын уугуул Мөнхбаярын Төртогтох хүү шалгарчээ. Тэрээр бүсийн уралдаанаас нэг айраг, аймгийн уралдаанаас нэг түрүү, хоёр айраг хүртжээ.
Өмнөговь: Цогтцэций сумын уугуул Буянхүүгийн Цэнгэлбадрах шалгарлаа. Б.Цэнгэлбадрах хүү АХ-ын 93 жилийн ой үндэсний их баяр наадмаас нэг айраг, аймаг, сумдын уралдаанаас нэг түрүү, гурван айраг хүртжээ.
Сүхбаатар: Сүхбаатар сумын уугуул  Батхуягийн Энхболд хүү улс, бүсийн наадмаас хоёр айраг, аймаг, сумын уралдаанаас нэг түрүү, гурван айраг хүртжээ.
Сэлэнгэ: Цагааннуур сумын уугуул Эрдэнэгэрэлийн Бат-Эрдэнэ хүү аймаг, сумын уралдаанаас нэг түрүү 14 айраг хүртэн бусдыгаа хошуучилсан байна.
Төв: Зуунмод сумын уугуул Номин-Эрдэнийн Ган-Эрдэнэ аймгийн баяр наадмаас нэг түрүү, хоёр айраг хүртсэн амжилтаараа шилдгээр шалгарчээ.
Увс: Өндөрхангай сумын уугуул Рэгзэдмаагийн Эрдэнэбат хүү аймаг, сумын уралдаанаас таван түрүү, 18 айраг хүртэн бусдыгаа хошуучилжээ.
Ховд: Дөргөн сумын уугуул  Баттогтохын Мөнх-Оргил хүү бүсийн уралдаанаас дөрвөн айраг, аймаг, сумын уралдаанаас нэг түрүү, хоёр айраг хүртэн тэргүүлсэн байна.
Хөвсгөл: Мөрөн  сумын харъяат Батжаргалын Ганхүү улс, бүсийн наадмаас хоёр айраг, аймгийн чанартай  уралдаанаас нэг түрүү хүртэн хоймор нутгийн уралдаанчдыг тэргүүлжээ.
Хэнтий: Хэрлэн сумын уугуул Нямдаваагийн Отгонбаатар хүү бүсийн уралдаанаас нэг айраг, аймаг, сумын уралдаанаас гурван түрүү,нэг айраг хүртэн бусдыгаа хошуучилжээ.
Улаанбаатар: Баянзүрх дүүргийн харьяат Хөхөөгийн Мөнгөнхүлэг хүү бүсийн уралдаанаас нэг түрүү, хоёр айраг хүртэн улсын шилдэг уралдаанчаар шалгарсан байна.
Шилдгээр шалгарсан нийт уралдаанч хүүхдэдээ дараа дараагийнх нь уралдаануудад амжилт хүсье.
А.Тэлмэн