Тосонцэнгэл сумын Алдарт уяачдын тоо 14-өөр нэмэгдлээ

Хөвсгөл аймгийн Тосонцэнгэл сумын “Тосон хурд” МСУХ-ны нэрэмжит хаврын бүсийн уралдааны үеэр тус холбооны шийдвэрээр Үндэсний их баяр наадмын тухай хуулийн дагуу дараах уяачдыг сумын Засаг даргын захирамжаар сумын Алдарт уяач цолоор шагнаж урамшууллаа. Үүнд:
Нэгдүгээр багийн уяач Ц.Няммөнх. Тосонцэнгэл сумын баяр наадамд их насны зургаан түрүү болон олон айраг, түрүүтэй.
Нэгдүгээр багийн уяач М.Эрдэнэдаваа. 1980- аад онд аварга алаг морио Тосонцэнгэл, Түнэл, Их-Уул, Мөрөн зэрэг суманд 10 гаруй түрүүлгэсэн.
Нэгдүгээр багийн уяач Ж.Мөнхдалай  сум орон нутгийнхаа баяр наадамд олон түрүүлж, айрагдсан хурдан борлог азарга болон хурдан хул мориороо алдартай.
Хоёрдугаар багийн уяач С.Алтанбаяр. Хурдан халтар азаргаа сумынхаа баяр наадамд 2түрүүлүүлж 2 айрагдуулсан. Сумынхаа баяр наадамд дээд 3 насны адуу түрүүлүүлсэн зэрэг бахдам амжилтын эзэн билээ.
Хоёрдугаар багийн уяач Т.Нацагдорж 2000 оноос хойш сумынхаа баяр наадамд 10 жилийн шигшээ унага уралддаг их насны морины нэг түрүү, долоон айргийн эзэн.
Хоёрдугаар багийн уяач Г.Батзориг. Хурдан хар морио сумынхаа баяр наадамд таван удаа айрагдуулснаас гадна аймгийн чанартай бүсийн уралдаанд хоёр түрүүлгэж, хоёр айрагдуулсан.
Хоёрдугаар багийн уяач П.Цогтбаатар. Хурдан халтар азаргаа Тосонцэнгэл сумын баяр наадамд хоёр түрүүлгэсэ. Мөн 2010 оны Тосонцэнгэл сумын баяр наадамд хоёр соёолон дараагаар нь оруулсан юм.
Гуравдугаар багийн уяач Э.Эрдэнэбаатар. Хурдан хар мориороо аймаг, сумын баяр наадамд олон айраг, түрүү хүртсэн. 2001 оны Хөвсгөл аймгийн 70 жилийн ойгоор айргийн тавд хурдлуулсан.
Гуравдугаар багийн уяач С.Болдбааатар. Хурдан хээр азаргаа сумынхаа баяр наадамд нэг түрүүлгэж, хоёр айрагдуулсан. Аймгийн баяр наадам болон аймгийн чанартай бүсийн уралдаанд нэг түрүүлгэж, хоёр айрагдуулсан.
Гуравдугаар багийн уяач С.Энхсайхан. Хурдан халтар азаргаа сумынхаа баяр наадамд тав айрагдуулсан
Дөрөвдүгээр багийн уяач Д.Баасанжав. Хурдан хээр азаргаа Тосонцэнгэл сумын баяр наадамд гурав түрүүлгэж, гурав айрагдуулсан ба хурдан улаан морио шүдлэн насанд нь аймгийн баяр наадамд түрүүлгэсэн.
Дөрөвдүгээр багийн уяач Ч.Дашням. Хурдан алаг азаргаа сумынхаа баяр наадамд нэг түрүлгэж, хоёр айрагдуулсан ба аймгийн чанартай бүсийн уралдаанд 3 түрүүлгэж,  3 айрагдуулсан
Тавдугаар багийн уяач Д.Гэндэнсүрэн. Өөрийн унаган хурдан халтар азаргаа Тосонцэнгэл суманд хоёр түрүүлгэж, нэг айрагдуулсан. Мөн аймгийн баяр наадамд айрагдуулж, хурдан халтар үрээгээ аймгийн чанартай бүсийн уралдаанд хоёр айрагдуулсан.
Тавдугаар багийн уяач С.Түмэнцогт хурдан хээр азаргаа сумынхаа баяр наадамд тав айрагдуулснаас гадна хурдан хүрэн морио сумынхаа баяр наадамд түрүүлгэж, аймгийн чанартай бүсийн уралдаанд гурав айрагдуулаад байгаа сайн уяач.
"Тосон хурд" МСУХ-ны Ажлын алба