Хурдан морины салбар комисс мэдээлэл хийлээ

Үндэсний их баяр наадмыг зохион байгуулах хорооны Хурдан морины салбар хорооны удирдлагууд өнөөдөр/VII.3/ баяр наадмын өдрүүдэд хурдын морины уралдааныг зохион байгуулах, эрлийз морьдыг хэрхэн ангилах талаар мэдээлэл хийлээ.
Энэ жилийн тухайд Хүй долоон худагт цугласан наадамчин олныг уйдаахгүй байх үүднээс “Морьтон монгол” үзүүлбэрийг морьд эргэх хугацаанд үзүүлэх гэнэ. Мөн “Монголын морин спорт уяачдын холбоо”-ноос холч, жороо морьдын уралдааныг зохион байгуулах нь энэ жилийн онцлог аж.
Хурдан морьдын уралдааны хуваарь:
    Долдугаар сарын 10-нд хязаалан, шүдлэн насны морьд
    Долдугаар сарын 11-нд азарга, их нас морьд
    Долдугаар сарын 12-нд соёолон, даага уралдана.
    Долдугаар сарын 13-нд Эрлийз морины уралдаан болж, Уяачдын баярыг тэмдэглэх юм.
Эрлийз морьдыг хэрхэн ангилах вэ?
Үндэсний их баяр наадмыг зохион байгуулах хорооноос монгол морьдоос эрлийз морьдыг тусад нь уралдуулах тогтоол гаргаж, 2011 оноос эхлэн тусад нь уралдуулж эхэлсэн. Уг тогтоолоор уралдах морьдын сэрвээний өндрийг хэмжих ажлын хэсгийг томилж, журамд заасны дагуу эрлийз морьдыг тусад нь уралдуулж буй. Эрлийз морьдыг уралдуулах журам, онцлогийн талаар Хурдан морины салбар хорооны дарга, хошууч генерал З.Болдбаатараас тодрууллаа.

-Хурдан морьдыг эрлийз, монголоор ялган уралдуулах шалтгаан юу байсан бэ?
-2011 оноос эрлийз морьдыг тусад нь уралдуулж эхэлсэн. Учир нь уяачдын хүсэлтээр “Монголын морин спорт уяадын холбоо”-ноос эрлийз морьдыг тусад нь уралдуулах журам гаргасан. Ер нь монгол морьдыг эрлийз морьтой хольж уралдуулахаар манай үндэсний хэв шинж, ялангуяа монгол адууны онцлог гарахгүй байна гэж үзсэн. Тиймээс сайн үйлдвэрийн, зүс сайтай морьдыг тусад нь уралдуулах нь зүйтэй гэдэг шийдвэрийг гаргасан юм.
-Нийтдээ хэдэн эрлийз морь уралддаг вэ?
-Жил бүр харилцан адилгүй тоогоор уралддаг юм. 2012 онд 50, 2013 онд 60-аад эрлийз морь уралдаж байсан бол 2014 онд 150 орчим болж нэмэгдсэн.
-Эрлийз морийг уралдуулахдаа нас, шүдээр нь ангилж уралдуулдаг уу?
-Тэгэлгүй яахав. Дотор нь гурав ангилж буюу эрлийз хурдан морины дээд нас, дунд нас, бага нас гэж гурав хуваадаг. Дээд насанд азарга, их нас, соёолон, дунд насанд хязаалан, шүдлэн харин бага насанд даагыг уралдуулдаг юм.
-Бай шагналын тухайд монгол морины уралдаантай ижил байдаг уу?
-Монгол морины уралдааны бай, шагналтай ижилхэн байдаг. Тэр байтугай уяачдад цол олгохдоо эрлийз морины уяачдыг оролцуулан дүгнэдэг.
-Өнгөрсөн жил хамгаалах хувцас, хэрэгсэлгүй уралдааны үеэр мориноос 14 хүүхэд унаж, бэртсэн. Энэ удаад уяач хүүхдийн аюулгүй байдалд хэрхэн анхаарах вэ?
-Унаач хүүхдүүдэд каскан малгай өмссөн байх, хамгаалах цээживч, өвдгөвч, тохойвчтой байх шаардлагыг тавьсан. Мөн гэнэтийн ослын даатгал хийлгэсэн байхыг ёстой. Өнгөрсөн жил мориноос унаж хүүхэд бэртсэн тохиолдол аймаг, сумдын наадмуудын үеэр гарсан. Нийслэлийн хэмжээнд бол уралдааны үеэр мориноос хүүхэд унаж, бэртээгүй.

Эх суралж: news.mn