Завхан аймгийн улсын шилдэг уяач Н.Бямбацогт: Эзэмшсэн мэргэжил маань морь уяхад дэм болдог

Улсын шилдэг уяач Завхан аймгийн Түдэвтэй сумын уугуул, аймгийн Алдарт уяач Намсрайжавын Бямбацогт. Тэрээр 2015 онд аймаг, сумдын уралдаанаас зургаан түрүү, 23 айраг хүртжээ.
-Улсын шилдэг уяачид баяр хүргэе. 2015 оныхоо амжилтаас хуваалцаач?
-Баярлалаа. Хонин жилийн уралдаан хавраас эхэлсэн. Манай аймаг таван бүсэд хуваагдаж уралддаг. Хойд бүсийн уралдаан Сант суманд болж, тэнд их насны морь маань түрүүлсэн. Түүний дараа дөрвөн сард  зүүн бүсийн уралдаан болж их морь маань  дахиад түрүүлсэн. Зун нь АХ-ын 94 жилийн ой, аймгийн баяр наадамд их морь маань амжилтаа бататгаж гурав  дахиа түрүүлсэн. Энэ бол олон давтагдахгүй амжилт. Товчхондоо миний бие өнгөрсөн жил аймаг, сумын чанартай уралдаанаас зургаан түрүү, 23 айраг хүртсэн байна лээ. Энэ амжилтаараа улсын шилдэг уяач боллоо.
-Их морь уяачийн эрдэм ухааныг шалгадаг гэдэг. Үнэхээр сайхан нааджээ. Ингэхэд Алдарт хэдий үеэс хурдан хүлгийн уяа сойлго тааруулж байгаа билээ?
-Аав минь малчин, адуучин хүн. Миний хүүхэд нас ч хөдөө малын захад өнгөрсөн. Наймдугаар ангиа төгсөөд ХАА-н техникумд мал зүйч мэргэжлээр суралцаж, дараа нь ХААИС-ийг малын эмч мэргэжлээр дүүргэсэн. Өнөөдөр уясан хүлгүүд маань хурдалж, аймгийн Алдарт уяач цол хүртэхэд миний эзэмшсэн мэргэжил тодорхой хэмжээнд нөлөөлж дэм болдог. Дээр нь өвөг дээдсийн маань морь уяж, сойж хурдлуулах арга барил мэдээж түлхэж болно.
-Таны мэргэжил мэдлэг зөвхөн өөрт төдийгүй нутаг орныхонд мөн дэм тусаа өгдөг байх?
-Тэгэлгүй яахав. Дан ганц өөрийнхөө эрх ашгийн төлөө бус нутаг орныхоо уяачид, хурдан морины зүтгэлтнүүдэд мэдэх чадахаасаа хуваалцалгүй яахав. Ер нь монголчуудын өв соёл уламжлал бол энэ мэтчилэн нэгээс нөгөөд уламжлагдаж ирсэн шүү дээ.
-Танай нутгийн залуучууд морь сонирхон уяж байна уу?
-Ер нь элбэг шүү. Ойрын хэдэн жил бүр илүү эрчимтэй залуу уяачдын эгнээ тэлж байна. Залуу хойч үе маань ийнхүү өв соёлдоо суралцаж буйд хувьдаа талархалтай явдаг.
-Засийн газрын тогтоолт баруун бүсийн уралдаануудад оролцож байна уу?
-Оролцож байсаан. Одоохондоо хараахан айраг, түрүү хүртэж амжаагүй байна.
-Бичин жил танд хайр хишгээд харамгүй хайрлах болтугай. Ярилцсанд баярлалаа.
-Баярлалаа. Та бүхний ажилд амжилт хүсье.
Б.Эрдэнэсүрэн