Аймгийн Алдарт уяач Г.Жадамбаа: Хэнмэдэх Тод манлайн хар миний хээрийг бараагүй л юм даа

Дундговь аймгийн Цагаандэлгэр сумын “Мөнхийн хүлэгтэн” уяачдын холбооны нарийн бичгийн дарга, аймгийн Алдарт уяач Готовын Жадамбаатай уулзаж ярилцлаа. Түүний хурдан хээр морь Цагаандэлгэр сумандаа  долоон жил завсаргүй түрүүлсэн ажнай байдаг билээ.
-Таныг  аварга хээр мориор чинь Дундговийнхон андахгүй юм билээ. Ямар амжилт үзүүлсэн хүлэг вэ?
-Хээр морь маань сумынхаа наадамд завсаргүй долоон жил түрүүлсэн. Хамгийн сүүлд 14 настай түрүүлсэн. Гаднаас ямар ч морь ирсэн өмнөө гишгүүлдэггүй хурдан буян байсан юм.
-Сайн морьд ирж хүч үзэж байсан биз?
-Олон сайн морьд ирсэн. МУ-ын Тод манлай уяач  Хэнмэдэх гуайн улсад соёолонд түрүүлдэг хар морь ирж уралдаад бараагүй л юм даа.
-Та хэзээнээс морь уяж эхэлсэн бэ?
-1993 оноос л хойш морь уясан. Манай аав морь уядаггүй хүн байсан болохоор би хожуу морь уясан юм. Бас аймгийн Алдарт  Отгонгэрэл гээд дүү  маань морь уядаг. 1997 онд Говь-Угтаалын 70 жилийн ойн наадамд хязаалан морь түрүүлгээд моринд эргэлт буцалтгүй орсон хүн дээ. Түүнээс хойш айраг түрүү тасраагүй байна.
-Таны хээр морь улс бүсийн наадамд яаж давхиж байв?
-2003 оны “Боржигон хурд” уралдаанд, 2005 онд Багануурын бүсийн наадамд айрагдсан.  2006 онд улсын наадамд хээр морьтойгоо ирж уралдаад зургаад давхисан. Улсын наадамд ганц очсон нь тэр.
-Аймгийн наадамд  яаж  уралдаж байсан бэ?
- За нэг их ирээгүй ээ. Ганц  удаа айраг авсан. Хээр морьтойгоо сумаасаа гараад уралдахаар түрүүлж чаддаггүй юм. Гэхдээ айргаас мултарна гэж байхгүй. Уяачид миний хээр морийг хараад хурдан адуунд байх бүх шинж бүрдсэн хүлэг юм гэдэг.
-Аль зүгийн адуу вэ?
-Цагаандэлгэрийн унаган адуу. Дээд угшилд нь Даваанэрэн начны хурдан халзан азарганы цус орсон л гэж ярьдаг.
-Хамгийн сүүлд ямар наадамд уралдсан бэ?
-16 настайд нь Дорноговь аймгийн Айраг сумын 80 жилийн ойн баяр наадамд айрагдсан. Дараа жил нь хортой өвс идээд  эндсэн дээ.
-Таны нэртэй өөр ямар ямар хурдан хүлгэд байв?
-Хонгор халзан азарга байсан. 2006 онд “Дүнжингаравын хурд” уралдаанд зургаад давхисан. Мөн Багануур Бага Хэнтийн бүсийн наадамд түрүүлсэн. Түүнээс гадна олон  бооцоот уралдаанд түрүүлсэн дээ. Сүүлийн үед ах нь унаган бага адуугаар л голдуу наадаж байна  даа.
-Уясан хүлэг тань хурдан байж тод магнай торгон жолоогоо өргүүлж явах болтугай.
"Тод магнай" сэтгүүл Дундговь аймгийн тусгай дугаар