Аймгийн Алдарт уяач Д.Мөнх-Эрдэнэ: Уяачдынхаа хийморийг сэргээхийн тулд Алтан-Овоо Шилийн богд орох аяллыг зохион байгуулсан

Цагаандэлгэр сумын “Мөнхийн хүлэгтэн” уяачдын холбооны тэргүүлэгч гишүүн, аймгийн Алдарт уяач Д.Мөнх-Эрдэнэтэй уулзаж ярилцлаа.
-Цагаандэлгэр сумын уяачдын холбоо байгуулагдаад чамгүй хугацаа өнгөрсөн.Анхны холбооны нэг гэдэг билүү?
-2011 онд манай сумын уяачдын холбоо 15 жилийнхээ ойг тэмдэглэсэн. Аймгийн хэмжээнд 15 жилийнхээ ойг хийсэн анхны холбоо бол манайх. Ойн медаль гэж гаргасан. Аймгийн хэмжээнд хамгийн олон Алдарт уяачтай сум бол Цагаандэлгэр. Тийм ч учраас бүсийн чанартай наадмуудыг сумандаа зохион байгуулах талаар судалж байна. Өвгөн ноёны наадмыг 2002 онд зохион байгуулж бүсийн наадмыг сумын хэмжээнд зохион байгуулсан анхны сум боллоо. Манай холбооны дарга Ч.Мөнхнаст ахын л зүтгэл шүү дээ. МҮМУХ-ноос “Тэргүүн манлай  хүлэгч” гэсэн цолыг авсан хүн.
-Уяачдын холбоогоо төрийн бус байгууллага болгочихсон уу?
-15 жилийн ойгоо тэмдэглэснийхээ дараа тамга тэмдгээ авч “Мөнхийн хүлэгтэн” уяачдын холбоо төрийн бус байгууллагын үйл ажиллагаанд орсон. Манай холбоо элссэн уяачдаасаа нэг бог мал авдаг. Одоо холбооны мэдэлд 100 гаруй бог мал бий. Манай холбооны залуу  уяач нар сумын наадмынхаа айргийг бэлдэж өгдөг уламжлал тогтсон.
-Сумын уяачид хол наадамд явахад нь холбооноос яаж тусалдаг вэ?
-Нэг  гал болоод явж байгаа тохиолдолд  холбооноос тодорхой хэмжээний тусламж үзүүлнэ. Бид сүүлийн гурван жил уяачдынхаа хийморийг сэргээхийн тулд Алтан-Овоо Шилийн богд орох аяллыг зохион байгуулсан. Тухайн жилдээ амжилт гаргасан 15 уяачийг авч явдаг. Энэ бол уламжлал болсон ажил.
-Цагаандэлгэр бол хурдтай сум. Аймгийнхаа наадамд  хэрхэн уралдаж байна?
-Айраг түрүү тасрахгүй байх гэж боддог. Дундговь аймгийн наадамд дөрвөн удаа түрүүлсэн Пүрэвийн хул азарга, мөн Сайнбаяр, Түвдэнням, Мягмардорж гэсэн хүмүүсийн удмыг залгасан хүмүүс нь аймгийн хэмжээнд Цагаандэлгэр сумынхаа нэрийг гаргаж явсан. Жадамба, Отгонгэрэл гээд сайн уяачид манайд олон бий. 
"Тод магнай" сэтгүүл Дундговь аймгийн тусгай дугаар