Аймгийн Алдарт уяач Б.Лхагва-Очир: Түрүүлчих болов уу гэж горьдож нэг жил хүлээлээ

АХ-95 жилийн ойн баяр наадамд хурдан 306 хязаалангаас магнайдаа тоосгүй түрүүлсэн хүрэн хязаалангийн эзэн Дундговь аймгийн Хулд сумын уугуул, аймгийн Алдарт уяач Б.Лхагва-Очирын баярын сэтгэгдлийг хуваалцлаа.
-Баяр хүргэе. Хүрэн үрээ төрийн их баяр наадамдаа түрүү магнайд хурдаллаа. Манай уншигчтай баярын сэтгэгдэл хуваалцахгүй юу?
- Сайхан байна. Өнгөрсөн жилийн баяр наадамд түрүүлж яваад хадуураад гурвалсан юм. Өнөө жил сайхан түрүүллээ баяртай байна.
- Үсэргээн сунгаанд хэрхэн давхиж байв, айрагдана гэдэгт хэр итгэлтэй байв уу?
- Өнгөрсөн жил түрүүлж орж ирээд хадуурч яваад айрагдсан учраас түрүүлчих болов уу гэж горьдож нэг жил хүлээлээ. Сумандаа уяагаа тааруулан Дундговь аймгийн Сайхан-Овоо, Гурван сайханд түрүүлээд улсын наадамдаа мордож түрүү магнайд хурдаллаа. Хүрэн хязааланг орчих болов уу гэж горьдож нутгийн намхан толгоддоо залбирч суулаа, түрүүлээд ирэхэд нь хэлэх үг олдохгүй сайхан санагдлаа. Аавын минь хөдөлмөрийн үр шим, алтан тууртын буян, нутгин зон олон намхан буурал толгод ивээж өнөөдөр ийм амжилт гаргалаа. Аав наашаа ирээгүй, хамгийн түрүүнд аав руугаа л ярьж баяр хүргэлээ аав минь “Хүүдээ, хүлэгтээ, унасан унаач хүүхэддээ л их баярлалаа” гэсэн.
- Төрийн их баяр наадамдаа тоосыг нь өргүүлэх хичнээн хүлэгтэй ирсэн бэ?
- Уяа сойлгоо сумандаа тааруулаад сумаасаа гурвуулаа улсын баяр наадмаа зорьсон. Хоёр ахтайгаа, сая айргийн гуравт хурдалсан шарга үрээний эзэн  Батжаргал ах, мөн хамт уядаг аймгийн Алдарт уяач Эрдэнэтөгс. Дөрвөн насанд таван морьтой ирлээ, азарга шүдлэн, соёолон мордуулна. Хязааланд манай уяанаас хоёр мордож нэг нь түрүү, нэг нь айргийн гурваар орлоо. Төрийн их баяр наадам өнгөтэй сайхан эхэлж байна. 
- Лхагва-Очир уяачийн хувьд он гарсаар хаагуур наадав?
- Дүнжингарав, Өвөрхангайн бүсэд очин одтой наадлаа. Өвөрхангайн бүсэд соёолон үрээ айрагдуулан мөн аймаг сумынхаа наадмуудад өнгөтэй наадлаа, морьд хурдан сайхан наадам болж байна. 
- Ярилцсанд баярлалаа. Дараа дараагийн уралдаанд нь амжилт хүсье. 
А.Энхжил