Сумын Алдарт уяач О.Түвшинбат: Морь айрагдсан наадам болгон сайхан

Говьсүмбэр аймгийн Сүмбэр сумын уугуул, сумын Алдарт уяач Очирбатын Түвшинбаттай хийсэн ярилцлагыг уншигч танаа хүргэж байна.
-Залуу Алдарт хэзээнээс уяаны эрдэмд шамдаж байгаа билээ?
-Есдүгээр ангидаа соёолон зээрд азаргаа хүүхэдтэй, хүүхэдгүй хоёр түрүүлгэж байлаа. Эхлээд дутуу эргэлтэнд хүүхэд нь ойчоод түрүүлсэн. Дахиж уралдаад хүүхэдтэйгээ хол түрүүлсэн. Энэ бол миний анхны бие дааж морь уясан наадам. Түүнээс хойш морь уяад 30-аад айраг, түрүү хүртсэний дөрөв нь аймгийн амжилт юм.
-Аймгийн наадамд айрагдсан морьдуудаа тухайлаад яриач?
-2011 оны наадамд хязаалан зээрд үрээ дөрөвт орж байлаа. Зээрд үрээ Өвгөн цавьдрын төл гүүнээс гарсан, эцэг нь манай ахад байгаа хар азарга бий. Зээрд үрээ шүдлэндээ Дэлгэрхаан сумын наадамд гуравт давхиж, хязааландаа аймагтаа айрагдаад Сүхбаатар аймгийн Наран сум руу зарагдсан даа.
-Бас шүдлэн аймгийн наадамд айрагдсан гэсэн.Тэр нь?
- 2014 оны наадамд шүдлэн хээр үрээ аймагт гуравт орсон. Хээр үрээ эцэг талаараа мөн л Өвгөн цавьдрын цустай. Харин эх нь улсад айрагдсан Төмөрхуягийн хээр азарганы төл халтар гүү байдаг юм. Даагандаа зургаа түрүүлж, хоёр айрагдсан.
-Хоёр дааганыхаа тухайд?
-2012 онд нэг нь айрагдаад, сумын Алдарт болдог жил нэг нь айрагдсан. Хонгор даага нь  хээр үрээтэй эцэг нэгтэй. Даагандаа Хэрлэнбаян-Улаан, Шивээговь, Баянталын Лүнгийн овооны тахилгат тус тус аман хүзүүдээд Данзанравжаад очиж есөд орсон. Харин хүрэн нь эцэг өөртэй, эх нэгтэй. Даагандаа аймагт тавд давхиад хөлөндөө сэвтэй болчихсон юм.
-Унаган адуугаараа урамтай сайхан наадаж байгаа юм байна шүү дээ?
-Тиймээ, ааваасаа өвлөсөн унаган адуугаараа л наадаж байгаа. Сүүлийн үед эрлийз адуу сонирхоод Араб цустай даага авсан. Энэ жил гайгүй давхисан.
-Энэ  хусуур, сойз аавынх тань уу?
-Тиймээ. Өвөөгөөс өвлөгдөж ирсэн хусуур байгаа юм. Аавын эмээл, хусуур гээд бүгд надад бий.
-Энэ хонин жилийн уралдаанаас хичнээн айраг, түрүү аваад байгаа вэ?
-Энэ жил гантай байсан болохоор айхтар шамдаж морь уясангүй. Хавар битүү үрээ уяж бага наадамд хоёр түрүүлгэлээ. Зун нэг даага Дэлгэрхаан суманд түрүүлгэсэн. Өөр уралдсангүй дээ.
-Залуу уяачийн дараа дараагийн уралдаануудад амжилт хүсье.
-Баярлалаа. Ерөөл бат орших болтугай.
 "Тод магнай" сэтгүүл Говьсүмбэр аймгийн тусгай дугаар