Аймгийн Алдарт уяач Ж.Энхболд: Би унаган хүлгүүдээрээ л нааддаг

- Ардын хувьсгалын 96 жилийн ойн их баяр наадамд адуун сүргийн манлай азарга айрагдуулсан танд баяр хүргэе.
-Нутаг орон гандуухан байгаа ч монгол түмний уламжлалт их баяр цэнгэл наадам дэлгэр сайхан болж байна. Хул азарга маань улсын баяр наадамд айрагдсанд сэтгэл маш их өндөр байна.
- Энэ жилийн баяр наадмын онцлог гэхээр уяач болгон л ялгалтын талаар ярьж байна. Эрлийз адууг монгол адуунаас ялгаж уралдуулах шийдвэрийг та хэрхэн хүлээж авсан бэ?
-Хамгийн гол нь хууль, шийдвэрээ тогтвортой л болгох хэрэгтэй байна. Учир нь, бид хуулиа л дагана шүү дээ. Аливаа шийдвэр гаргахдаа ч бүхнийг тодорхой болгомоор байна. Тэр хол газраас төрийн наадамдаа морьдоо уралдуулахаар зориод ирдэг. Гэтэл авч ирсэн морьдыг маань уралдуулдаггүй. Хамгийн гол нь монголтойгоо ирсэн ч, эрлийзтэйгээ ирсэн ч хасчихаад байгаад сэтгэл их дундуур байх юмаа. Уяач хүн бүтэн жилийнхээ хөдөлмөрийн үр шимийг үзэх гэж л улсын наадмыг зорьдог юм шүү дээ.
- Өнөөдөр бүсийн уралдаанууд болж байна. Та морьд мордуулав уу?
-Уралдуулсангүй ээ. Би  ер нь улсын баяр наадамдаа л мордуулдаг юм.
- 2009 онд төрийн наадамд таны шүдлэн айрагдсан. Дараа нь даага түрүүлгэж байсан. Энэ жилийнхтэй нийлээд улсын баяр наадмаас нийт хэдэн айраг, түрүү хүртэж байна вэ?
-Анх Сэлэмт гэдэг хүрэн халзан шүдлэн айрагдсан. Ардын хувьсгалын 90 жилийн ойн баяр наадмаар хүрэн даага дөрвөөр давхисан. Хойтон жил нь шүдлэн түрүүлж, хязаалан зургаагаар хурдалсан. Мөн 2013 билүү, 2014 онд эрлийз даага аман хүзүүдсэн. Ингээд энэ жилийнхтэй нийлээд таван айраг, түрүүтэй болж байна.
- Төрийн наадамд торгон жолоо өргүүлсэн эдгээр хүлгүүд тань хаанахын ямар угшилтай вэ?
-Дандаа л миний унаган адуунууд байгаа юм. Би хүнээс авсан адуугаа ерөөсөө уядаггүй ээ. Хүнээс авсан адуунуудын төлүүд одооноос л давхиж эхэлж байна.
- 2009 оноос өмнө төрийн наадамд морь мордуулж байгаагүй юм уу?
-Анх 2008 онд төрийн наадамд хязаалан үрээ мордуулаад, зургаагаар давхиулж байлаа. Тэр хязаалангаа “Уулс трейд”-ийн Галаа гэдэг хүнд зарсан юм. Хойтон жил нь Галаагийн нэр дээр улсын баяр наадамд айрагдсан.
- Энэ жил та хэдэн насанд морь мордуулсан бэ?
-Би энэ жил ганц азарга л мордуулсан юм. Манай хүү Ганчулууны нэртэй соёолонг дүү Ганчулуун маань уяж, нэр дээрээ уралдуулаад айргийн дөрөвт давхиуллаа.
- Энэ жил одтой сайхан нааджээ. Наадмын од үеийн үед таныг ивээх болтугай.

А.Тэлмэн