Тод манлай уяач Х.Бат-Эрдэнэ: Төрийн наадмын хурдан морины уралдааны зохион байгуулалтыг уяачдын холбоонд хариуцуулах нь зүйтэй

- Ардын хувьсгалын 96 жилийн ойн баяр наадам зуны бүсийн уралдаанаар отголж байна. Та энэ жил хаана, хаана ямар амжилттай наадав?
-Сэлэнгэ, Багануурын төвийн уралдаануудад морьд мордуулж, нэг түрүү, дөрвөн айраг хүртэж, одтой сайхан наадлаа. Тодруулбал, Багануурын төвийн бүсийн наадмын эрлийз дунд насанд сартай хар үрээ түрүүллээ. Сэлэнгэд соёолон, хязаалан, эрлийз дунд насанд хар үрээ тус тус айрагдлаа. Улсын баяр наадмын айрагтайгаа нийлээд таван айраг болж байна.
- Та энэ жил улсын баяр наадамд хэдэн насны морьд сойв?
-Азарганаас бусад бүх насанд морь уясан. Гэвч дөрөв, таван монгол үрээгээ хасуулчихлаа. Даага түрүүлсэн боловч бас ч хасуулчихсан. Ямар үндэслэлээр хасч байгаагаа ч тайлбарласангүй.  
- Таны хувьд ММСУХ-ны дэд ерөнхийлөгчийн албыг хашиж буй. Энэ ч утгаараа өнөө жилийн уралдаанууд холбооноос баримталж байгаа бодлого, чиглэлд хэр нийцэж байгааг ажиглаж, дүгнэн эргэцүүлж л суугаа байлгүй?
-Улсын баяр наадмын хувьд уяачдын хөдөлмөрийг хэт үнэгүйдүүлсэн, хэт туйлширсан болж өндөрлөлөө. Уяачдын холбооныхны бодлого, зохион байгуулалт ч нэг их нөлөөлсөнгүй. Үнэндээ ганц хоёрхон хүний өнгө үзэмжээр хүмүүсийн морьдыг хасч, уралдуулаагүй явдал нэлээд гарлаа. Харин айрагдуулахаа хүрвэл эрлийз адуу ороод ирсэн ч айрагдуулчихаж л байна.
- Тэгвэл бүсийн уралдааны тухайд?
-Бидний очиж оролцсон бүсийн уралдаанууд сайхан л болж өндөрлөлөө. Бүсийн уралдаануудад уяачдын холбоо хяналтаа тавиад явж байгаа нь л болж байна. Цаашдаа Баяр наадмын зохион байгуулах комисс хурдан морины уралдааныг мэргэжлийн холбоонд хариуцуулаад өгчих хэрэгтэй юм шиг санагдаж байна. Учир нь, мэргэжлийн бус хүмүүс л морь мэдэхгүй, наадам будилаантуулдаг. Энэ бүхнийг цэгцэлж, нэг мөр болгох цаг нь болсон гэдгийг энэ жилийн улсын баяр наадам харууллаа.
- Энэ жил ММСУХ-ны VII их хурал хуралдах учиртай. Энэ асуудал тэр хурлаар л нэгмөр шийдэгдэх болов уу. Ер нь энэ талаар их хурлын хөтөлбөр, хэлэлцэх асуудалд тусгасан уу?
-Урьдчилж ярилцсан зүйл одоогоор алга. Уяачдын санаа нэгэнт энэ асуудал дээр төвлөрч байгаа учраас хүссэн, хүсээгүй л энэ талаар хэлэлцэх байлгүй. Үнэнийг хэлэхэд уяачид дотроо хагаралдаж, бутралдаад, үзэл бодлоороо зөрчилдөөд байдаггүй юм шүү дээ. Бүгд л нэг чигт зорьдог. Энэ ч утгаараа бид аливаа асуудлыг хөндсөн л бол нэг шийдвэрт хүрч чаддаг давуу талтай.

А.Тэлмэн