Уралдаанч Б.Цэнгүүн: Морь унах гоё

Баяр наадмын гурав дахь өдөр буюу долдугаар сарын 12. Долдугаар сарын 10-нд хязаалан, шүдлэнгээр эхэлсэн монгол хурдан морьдын уралдаан энэ өдөр өндөрлөж, Төв цэнгэлдэхэд түрүүлж, айрагдсан шандаст хүлгүүдийг наадамчин олны өмнө цоллосон юм.  Энд монгол орны дөрвөн зовхис, найман зүгээс ирсэн уяач, уралдаанч хүүхдүүд ирсэн байх агаад эдний дунд бяцхан хүү ч баяртай  байгаа нь царайнаас нь илт. Тэр “ажлын хувцсаа” тайлаад тод өнгийн хувцсаар гоёжээ. Бас Ерөнхийлөгчөөс гардан авсан бэлгийн цүнхээ үүрч, өргөмжлөлөө сугандаа  бат гэгч нь хавчуулсан аж. Ингээд цоллуулсан уяач, уралдаанч хүүхэд, хурдан хүлгэдийнхээ хамтаар цэнгэлдэхээс гарлаа. Уралдаанч хүү Б.Цэнгүүн анх удаа улсын наадамд морь унаж, аман хүзүүгээр хурдлуулсан бөгөөд өргөмжлөл дээр бичсэнийг тун анхааралтай уншиж байхтай таарсан юм. 

-Сайхан наадаж байна уу. Өргөмжлөл дээр нь юу гэж бичсэн байх юм бэ?

-Сайхаан. Та сайхан наадаж байна уу. Энд “Тулгар төрийн 2227, Их Монгол Улсын 812, Ардын хувьсгалын 97 жилийн ойн их баяр наадмын шүдлэн насны уралдаанд унасан морь нь аман хүзүүнд хурдалсан тул баяр хүргэж, өргөмжлөл, үнэ бүхий зүйлээр шагнав” гэжээ.

-Гоё байна уу?

-Тийм ээ. Сайхан санагдаж байна.  Морь унах гоё. Тэр тусмаа айраг, түрүүгээр хурдлуулаад ийнхүү цэнгэлдэхэд цоллуулах бүр ч гоё юм аа.

-Энэ жил хэдэн насны морь унав. Бусад нь  яаж давхив?

-Баяр наадмаар зургаан насны морь уналаа. Үүнээс шүдлэн аман хүзүүлж, бусад нь дажгүй сайхан давхиад л ирлээ.

-Өмнө нь морь унаж байсан уу?

-Дөрөв дэх жилдээ морь унаж байна. Монгол Улсын Тод манлай уяач Д.Ононгийн уясан морьдыг унадаг. Өнгөрсөн хугацаанд түүний уясан морьдоос нэгийг аман хүзүүдүүлж,  бас нэг тавлуулсан. Харин энэ жил шүдлэнд Увс аймгийн Зүүнговь сумын уяач Б.Норовсамбуугийн үрээг унаж хурдлууллаа.

-Дөрвөн жил морь унаж байна аа. Ийм жижигхэн байж уу?

-Тийм ээ, анх нэгдүгээр ангидаа морь унаж байлаа. Би чинь одоо нийслэлийн 59-р дунд сургуулийн 5в ангид сурдаг юм.

-Том болоод ямар мэргэжилтэй болох вэ?

-Том болоод уяач болно доо. Яг л Алтанхуяг  ах шигээ уяач болно гэж боддог юм.

Тэр үг дуу цөөтэй юм. Гэхдээ бас их хэрсүү нөхөр бололтой. Хариулт бүрээ бодож бодож хариулна гээч. Бид цааш нь олныг ярилцаж болох байсан ч уяач ах нар нь яаравчлуулснаар яриагаа өндөрлөхөд хүрсэн юм.