Арьс нимгэн адууг олон тарлаж болохгүй

Сайн адуу сайн давхих нь цөөн. Муухай адуу давхих нь олон. Адуу тус тус янзтай тул нэг адил уяж болохгүй. Арьс нимгэн, сэтгэл хөнгөн морийг их гишгүүлж,  олон хүчтэй тарлаж болохгүй. Заслага нийлсэн морь бие, сэтгэл нь хөнгөн амгалан жаргалантай байдаг. Уяа засал зохилдсонгүй морь зүс өнгө муу, хамар атирч, нүд нуухтаад олон хэвтэх бөгөөд бие хүнд байдаг. Адуунд дадал гэж байлтай. Юу гэвэл хүн өөрийн унаган адууг даага, үрээ цагаас нэмэх ба үл нэмэх олон цөөнд хол ойр давхих, хэдэн хоногтой засах, тарган эцэнхий уралдах зэргээ эзэн хүний мэдэлд болох тул тэр дадал сургуулиар дадаг боловуу.

Хол нутагтай хүнээс хурдан адуу авбал уяа засал солигдох мэт. Дөрвөн мөч дээд доодгүй тэгшхэн бүдүүхэн бөгөөд бие бэсрэг, хөнгөн, арьс мах элбэг  нимгэн бөгөөс  цуцал багатай байх магадгүй. Дээд бие хүнд сайн, тураг бөгөөд үе хөл нарийн бол газрын холд  цуцах магадгүй. Харин таван цулын толгой эрхтэнд үзэх хэрэгтэй.

Хужир муу гэдэг. Юу ч болов анх уяхаас цагдан цээрлэж байгаад осолдон хар шороо хужир балмаг идвэл муу биз. Их хужиртай ус нуур ууж байхад давхилд мах нь хөөсөн байдаг. Үүнийг хөлс дутуу гэж эндүүрч хэтрүүлэх магадгүй болов уу.

Алив морины бүх бие төгс бөгөөд чихний ургац эрс дээгүүр, холбоо үзүүр эсрэг харалцсан мэт бөгөөд төвгөр, нүд нь хар хүрэн бөгөөд уужим бүлтгэр, харц нь тогтуун сайхан, хамрын нүх бүрээний амсар мэт, хуулзар нь хуцын хуулзар мэт монхор, шанаа талхи нь хонхор, эрүүний яс матаастай, эрүүний толгойн хэв уртхан боловч мах нь хатангир, соёо урт, шүд урт тэгшхэн, цөгц нь гүнзгий, шөрмөс нь нимгэн, чанга, хий нь цээл уужим, хүзүү нь урт, дөрвөн хөлийн гишүүнүүд эрс, бэрэвхий нь эрс бөгөөд дөрвөн хуруу хэр, туурай эрс ирмэг бүдүүн, дал урт, сэрвээ өндөр, цавь бага, хавирга сүврэг нь өргөн урт бөгөөд матаас нь бөөрөнхий, борви хонго нь нугалаагүй бөгөөд шулуун, гуя нь гурын гуя мэт, салтаа нь гэрийн хаалга мэт ханхар, дэл сүүлний өтгөн шингэн нь дундаж, ширхэг нь нарийн цэвэрхэн бөгөөд эрчгүй мяндсан ширхэгтэй, бүх яс нь илэрхий төвгөр, мах хөрс бага бөгөөд хатангир, арьс нимгэн сул, үс нь бугын үс мэт тачир, бөөрний хий бага, ааль зан нь хөнгөн сайхан, аньсага уужим, хөлс элбэг, уяан дээр зогсож байхад толгой дээгүүр бөгөөд элдвийг эргэцүүлэн харж эргэн тойрч байх, морь давхихад бөхийж давхих.

Адуу ижилдээ явахаас баримагц дээрдэх, барьснаас эмээл засмагц дээрдэх, эмээл зассанаас унамагц дээрдэх, унаж энгийн явахаас давхимагц дээрдэх. Энэ мэт болбол нэгэн сайн морь байж магадгүй байна.