Мустанг Ковбойчуудын унаа

Мустанг бол Америк тивд ирж суурьшсан Испанийн цагаач иргэдийн морьдоос угшилтай өөрөөр хэлбэл, Андалуз, Араб, Барб гаралтай голдуу Хойд Америкт бэлчдэг зэрлэг морь юм. 300 гаруй жил зэрлэгээр идээшиж байсан учир тэсвэр хатуужилтай, хүчирхэг, байгаль цаг уурын ямар ч нөхцөлд зохицох чадвартай. Мустангийг эхэндээ индианчууд, нэлээд хожуухан ковбойчууд эдлэх болсон байна. Бод мал, тэр дундаа үхэр хариулахад нэн тохиромжтой төдийгүй, уналга, маллагаанд зохицсон морь гэж ковбойчууд үздэг байжээ. Америк тивд анхлан суурьшигчид Мустангийг өөрсдийн авчирсан морьдтой эвцэлдүүлж том биетэй ажлын морь бий болгохоор оролдож байсан бөгөөд Мустанг гаралтай хамгийн алдартай үүлдрүүд бол Куартер, Аппалуза, Паломино, Пинто юм. Орчин үед зэрлэг Мустангийн тоо толгой ихэд хорогдож хуулиар хамгаалуулахад хүрээд байна. Энэ үүлдрийн янз бүрийн угшлыг бүрэн бүтэн цэврээр хадгалахын тулд Испани Мустангийн, Испани Барб Мустангийн зэрэг бүртгэлийг бий болгожээ. Мөн Америкийн Мустангийн холбоо хүртэл байдаг гэнэ.

Гол баримт:

Зүс: бүх зүс
Өндөр: 150-160 см
Галбир: янз бүр, багавтар биетэй, хүчирхэг хөлтэй
Зан төрх: Бие даасан чөлөөтэй, сургахад хэцүү
Гол хэрэглээ: Мал хариулах, уналга, уралдаан
Угшил: Андалуз, Араб, Барб, Турк, Мустанг Аварга биет номхон хүлэг

185 см орчим өндөр, бараг тонн гаруй жинтэй Шайер морь бол ачааны морины үүлдрүүдээс хамгийн том нь юм. Энэ морийг дундад зууны үеийн баатар эрсийн унаж байсан “Great Horse”, эсвэл “Old Enhlish Black” мориноос үүссэн болов уу гэж үздэг. Үүсэл гарал нь ч бүрхэг бөгөөд хойд Европын Фландер, Фриезээс угшилтай болов уу гэж таамаглах нь бий. Шайер нь XVIII, XIX зууны үед Төв Европын улсуудад ихээхэн тархсан бөгөөд голдуу ачлага, тээвэрт хэрэглэдэг байв. Аж үйлдвэрийн хувьсгалын үеэр бараа материал, түүхий эд зөөх бүхий л ажлыг зөвхөн Шайер морьд л гүйцэтгэдэг байсан аж. Хэрэгцээнээс болж хэт чанаргүй, эрлийз Шайер элбэгшсэн тул уг үүлдрийн удмын санг цэвэр байлгахыг эрхэмлэж ирсэн байна. Энэхүү гайхалтай ухаалаг морьтой харьцаж ажиллахад тун хялбар. Өдгөө урьдынх шиг ачаа уналганд их ашиглагдахаа больсон ч шоу үзвэрт үзэгчдийг татах гол “баатар” болсоор байна.